बेकरीच्या धुरातून मुक्ततेसाठी कारवाईची मागणी

बेकरीच्या धुरातून मुक्ततेसाठी कारवाईची मागणी
सानपाडावासीयांचे रवींद्र सावंत यांना साकडे
नेरूळ, ता. २० (बातमीदार) : सानपाडा सेक्टर ६ मधील एका बेकरीत इंधन म्हणून लाकडाचा वापर केल्याने निर्माण होणाऱ्या प्रचंड धुरामुळे सानपाडा सेक्टर ६ आणि १० तसेच आजूबाजूच्या परिसरातील रहिवाशांच्या आरोग्याला गंभीर धोका निर्माण झाला आहे. या बेकरीच्या धुरामुळे डोळ्यांना जळजळ, छातीत दुखणे आणि श्वसनास त्रास होण्याच्या तक्रारी वाढल्या होत्या. सेक्टर १० मधील श्री गणेश कृपा सहकारी संस्थेने याबाबत पालिकेकडे लेखी तक्रार करूनही कारवाई होत नसल्याने नागरिकांमध्ये तीव्र नाराजी होती.
अखेर स्थानिक रहिवाशांनी सामाजिक कार्यकर्ते रवींद्र सावंत यांची भेट घेऊन समस्या सोडविण्यासाठी त्यांना साकडे घातले. सावंत यांनी तातडीने नवी मुंबई महापालिका सानपाडा-तुर्भे विभाग कार्यालयातील अधिकाऱ्यांशी संपर्क साधला. त्यानंतर मुख्य स्वच्छता अधिकाऱ्यांसह संयुक्त पाहणी करण्यात आली. पाहणीदरम्यान बेकरीतील बांधकाम, लाकडाचा इंधन म्हणून वापर आणि अपुरी चिमणी व्यवस्था निदर्शनास आली. रात्रीच्या वेळी धूर थेट वस्तीत पसरत असल्याचेही स्पष्ट झाले.
पाहणी अहवालानंतर पालिकेच्या पथकाने संबंधित बेकरीला नोटीस बजावली. याच वेळी परिसरातील नाल्यातून येणारी दुर्गंधी व तुटलेले पदपथ यांचीही पाहणी करण्यात आली. सावंत यांच्या तक्रारीची दखल घेत पालिकेने स्वच्छता अभियानही राबविले. त्यांच्या सक्रियतेमुळे सानपाडावासीयांनी समाधान व्यक्त करीत रवींद्र सावंत यांचे आभार मानले.
चौकट
बेकरीला नोटीस
सानपाडा सेक्टर ६ मधील बेकरीत लाकडाच्या इंधनामुळे मोठ्या प्रमाणावर धूर निर्माण होत असून, तो थेट रहिवासी भागात पसरत होता. यामुळे नागरिकांच्या आरोग्यावर विपरीत परिणाम होत होता. स्थानिकांच्या सातत्यपूर्ण तक्रारी व रवींद्र सावंत यांच्या पुढाकारामुळे अखेर पालिकेने पाहणी करून बेकरीला नोटीस दिली. ही रहिवाशांसाठी मोठी दिलासादायक कारवाई ठरली.