‘एल्फिन्स्टन’ बाधितांच्या घरांच्या दुरुस्तीसाठी सव्वा कोटीचा खर्च

‘एल्फिन्स्टन’ बाधितांच्या घरांच्या दुरुस्तीसाठी सव्वा कोटींचा खर्च
मुंबई, ता. २० : वरळी-शिवडी कनेक्टरसाठी एल्फिन्स्टन येथील जुन्‍या पुलाच्या जागी नवीन डबल डेकर पूल उभारला जाणार आहे. त्यामुळे बाधित होत असलेल्या एल्फिन्स्टन येथील बाधित रहिवाशांना लवकरच हक्काची चकाचक घरे मिळणार आहेत. त्यासाठी म्हाडाने सुमारे एक कोटी २५ लाख रुपयांचा खर्च केला आहे. त्यानुसार म्हाडाच्या घरांची दुरुस्ती करून त्यांना ही घरे दिली जाणार आहेत. एल्फिन्स्टन पुलाच्या कामामुळे येथील हाजी नुरानी आणि लक्ष्मी निवास या दोन इमारती बाधित होणार आहेत. लक्ष्मी निवास या इमारतीत ६० तर हाजी नुरानी या इमारतीत २३ रहिवासी आहेत. संबंधित रहिवाशांना दादर, प्रभादेवी, वडाळा, लोअर परेल या भागातील म्हाडाची ८३ घरे मालकी तत्त्वावर दिली जाणार आहेत. त्यानुसार ‘एमएमआरडीए’ने या घरांची पाहणी करत वेगवेगळ्या प्रकारची दुरुस्ती सुचवली होती; त्याची दखल घेत म्हाडाने सदनिकांचे मुख्य दरवाजे, बेल पॅनल, भिंतीचे तडे, प्लास्टर, रंगरंगोटी अशा दुरुस्त्या केल्या आहेत. त्यासाठी सव्वा कोटी रुपये खर्च आला असल्याची माहिती म्हाडाच्या मुंबई इमारत दुरुस्ती व पुनर्रचना मंडळाच्या एका वरिष्ठ अधिकाऱ्याने दिली.