खोपोलीचा गड राष्ट्रवादी राखणार?

खोपोलीचा गड राष्ट्रवादी राखणार?
थेट नगराध्यक्ष पदासाठी परिवर्तन आघाडीबरोबर टक्कर
खालापूर, ता. २० (वार्ताहर) : खोपोली नगर परिषदेच्या चार वर्षांपासून रिकाम्या असलेल्या नगराध्यक्ष पदाच्या खुर्चीवर विराजमान होणार, हे रविवारी स्पष्ट होणार आहे. १५ वर्षांपेक्षा अधिक काळ नगर परिषदेत सत्ता राखणारी राष्ट्रवादी काँग्रेस पार्टी आता पक्षाच्या विभाजनानंतर अजित पवार गटाकडे किती प्रमाणात ठाम राहील, हे रविवारच्या निकालानंतर कळणार आहे. दुसरीकडे शिवसेना शिंदे गटानेही नगर परिषदेच्या पदांसाठी आपली व्यूहरचना आखली आहे.
खोपोलीचे आमदार महेंद्र थोरवे यांनी शिंदे शिवसेना गटाकडून थेट नगराध्यक्ष पदासाठी उमेदवार जाहीर केला, तर राष्ट्रवादी काँग्रेस अजित पवार गटानेदेखील महत्त्वाचा खेळाडू उभा केला आहे. आमदार थोरवे यांच्या पाठिंब्यावर सुनील पाटील यांचा चेहरा नगराध्यक्ष पदासाठी पुढे आला असून, परिणामी खोपोली आणि खालापूर तालुक्याचे लक्ष या पद निर्णयाकडे लागले आहे. नगर परिषदेत १५ प्रभागांमधून ३१ नगरसेवक निवडून दिले जाणार आहेत. नगरसेवक पदासाठी ११८ जण निवडणूक लढवत आहेत, तर थेट नगराध्यक्ष पदासाठी सात उमेदवार मैदानात आहेत. खरी लढत मात्र परिवर्तन आघाडी आणि शिंदे शिवसेनेत आहे. मतमोजणीसाठी प्रशासनाने संपूर्ण तयारी पूर्ण केली आहे. मतमोजणी १० टेबलांवर एकावेळी होणार असून साधारण आठ फेऱ्यांमध्ये संपूर्ण प्रक्रिया पूर्ण केली जाईल. मतदानाच्या वेळी शहरातील वाहतूक व जनजीवनावर कोणताही परिणाम होऊ नये म्हणून सेंट मेरी स्कूल, डीपी रोड येथे मतमोजणी आयोजित केली आहे. नगर परिषदेतील आगामी निकाल खोपोलीच्या राजकीय समीकरणासाठी निर्णायक ठरणार असून, शहराचे भविष्य आणि विकासाचा वेग कोणत्या गटाकडे जाईल, हे या निकालावर अवलंबून राहणार आहे.