मुलुंड गोल्फ कोर्स प्रकल्पाला गती

मुलुंड गोल्फ कोर्स प्रकल्पाला गती
आमदार कोटेचा यांनी घेतली कपिल देव यांची भेट
सकाळ वृत्तसेवा
मुंबई, ता. २० : मुलुंड येथे होणाऱ्या गोल्फ क्लबच्या कामाला वेग आला आहे. ऑलिम्पिक खेळ तळागाळातील तरुणपिढीपर्यंत पोहोचवण्यासाठी काय करता येईल, याबाबत आमदार मिहिर कोटेचा यांनी प्रोफेशनल गोल्फ टूर ऑफ इंडियाचे (पीजीटीआय) अध्यक्ष कपिल देव यांची नुकतीच भेट घेतली.

मुलुंड डम्पिंग ग्राउंड येथे गोल्फ कोर्ससाठी फिजिबिलिटी स्टडी करण्यास पालिकेने परवानगी दिल्यानंतर मुलुंडचे भाजप आमदार मिहिर कोटेचा यांनी दिग्गज क्रिकेटपटू आणि ‘पीजीटीआय’चे अध्यक्ष कपिल देव तसेच संस्थेचे मुख्य कार्यकारी अधिकारी कमलदीप सिंग यांची भेट घेतली.

गोल्फ आणि इतर ऑलिम्पिक खेळ तळागाळातील तरुण पिढीपर्यंत कसे पोहोचवता येतील, यावर आमची चर्चा झाली. यासाठी संधी कशा निर्माण करता येतील आणि कोणती पावले उचलणे आवश्यक आहे, यावर सविस्तर चर्चा झाल्याचे आमदार कोटेचा यांनी सांगितले. मुंबई व विशेषतः मुलुंडमध्ये ऑलिम्पिक खेळ आणि गोल्फचा तळागाळात प्रसार करण्यावर भर दिला जाईल, अशी माहिती त्यांनी दिली. मुलुंड येथे गोल्फ कोर्स उभारल्यास संपूर्ण मुलुंड परिसराच्या आर्थिक विकासाला मोठी चालना मिळेल, असा विश्वास आमदार कोटेचा यांनी व्यक्त केला.
--------------