आमदार पराग शाह यांच्या आंदोलनानंतर घाटकोपरमध्ये फेरीवाले व नियमबाह्य वाहनचालकांवर धडक कारवाई

फेरीवाले, नियमबाह्य वाहनचालकांवर धडक कारवाई
आमदार पराग शहा यांच्या आंदोलनानंतर घाटकोपरकरांना दिलासा
घाटकोपर, ता. २२ (बातमीदार) : घाटकोपरच्या पूर्व व पश्चिम भागात फेरीवाले तसेच वाहतूक नियमांचे सर्रास उल्लंघन करणाऱ्या वाहनचालकांमुळे नागरिकांची डोकेदुखी वाढली होती. या पार्श्वभूमीवर घाटकोपर (पूर्व)चे आमदार पराग शहा यांनी कार्यकर्त्यांसह थेट रस्त्यावर उतरून आंदोलन केले. या आंदोलनाची तातडीने दखल घेत पालिका प्रशासन आणि वाहतूक पोलिसांनी संयुक्तपणे धडक कारवाई सुरू केली असून, त्यामुळे घाटकोपरकरांना दिलासा मिळाला आहे.
आमदार पराग शहा यांनी चेंबूर व विक्रोळी वाहतूक विभागातील अधिकारी तसेच पालिकेच्या ‘एन’ विभागातील अधिकाऱ्यांना तातडीने कारवाईचे आदेश दिले. त्यानुसार घाटकोपर पूर्वेकडील रेल्वे स्थानक परिसर, विशेषतः जवाहर रोड व निलयोग मॉल चौकात विक्रोळी वाहतूक पोलिसांकडून कडक कारवाई सुरू करण्यात आली आहे. वाहतूक कोंडीसाठी ओळखल्या जाणाऱ्या ठिकाणी अतिरिक्त पोलिस तैनात करण्यात आले असून, नियमभंग करणाऱ्या रिक्षाचालकांवर दंडात्मक कारवाई केली जात आहे.
वरिष्ठ पोलिस निरीक्षक अशोक लांडगे स्वतः रस्त्यावर उपस्थित राहून कारवाईवर लक्ष ठेवत असून, त्यांच्या नेतृत्वाखालील पथक नियम तोडणाऱ्यांवर थेट कारवाई करत आहे. परिणामी, नेहमी गर्दीने फुलून जाणारे रस्ते सध्या मोकळे दिसत असून, नागरिकांनी सुटकेचा निःश्वास सोडला आहे. दरम्यान, कारवाईनंतरही काही रिक्षाचालक पोलिसांची नजर चुकवून पुन्हा मनमानी करत असल्याच्या तक्रारी नागरिकांनी केल्या आहेत. मात्र, यापुढे कोणाचीही गय केली जाणार नाही, असा इशारा वाहतूक पोलिसांनी दिला असून, ही कारवाई सातत्याने सुरू राहील, असेही अशोक लांडगे यांनी स्पष्ट केले. घाटकोपर पूर्व भागात, विशेषतः रेल्वे स्थानक परिसरात नागरिकांना मोकळा श्वास घेता यावा, यासाठी प्रशासन सातत्याने प्रयत्नशील असल्याचे वाहतूक पोलिसांनी सांगितले.

पदपथे, रस्‍त्‍यांवर अतिक्रमण
घाटकोपर पूर्व व पश्चिम भागात अनेक वर्षांपासून अनधिकृत फेरीवाल्यांनी फुटपाथ व मुख्य रस्त्यांवर अतिक्रमण केले होते. त्यामुळे वाहतूक खोळंबत होती तसेच पादचाऱ्यांना चालणेही कठीण झाले होते. याची गंभीर दखल घेत पालिकेने आता अधिक कठोर भूमिका घेतली आहे. घाटकोपर पूर्वेकडील वल्लभबाग लेन, खाऊ गल्ली रोड, टिळक रोड, विक्रांत जंक्शन परिसर, एम. जी. रोड, ओडियन सिनेमा परिसर, गुरुकुल हायस्कूल परिसर आदी ठिकाणी अनधिकृत फेरीवाल्यांवर कारवाई सुरू आहे. यापूर्वी फक्त दंड आकारला जात होता, मात्र आता फेरीवाल्यांचा माल जप्त करून परत न देता कठोर दंडात्मक कारवाई केली जात असल्याची माहिती घाटकोपर ‘एन’ विभागाचे सहाय्यक पालिका आयुक्त गजानन बेल्लाळे यांनी दिली.