नववर्ष स्वागतासाठी वसईकर सज्ज

नववर्ष स्वागतासाठी वसईकर सज्ज
रिसॉर्ट्स, हॉटेल्स, ढाब्यांना पर्यटकांची पसंती
विरार, ता.२३ (बातमीदार)ः नववर्ष स्वागतासाठीच्या तयारीला वेग आला आहे. याच पार्श्वभूमीवर वसई पूर्वेकडील ग्रामीण भागातील रिसॉर्ट्स, हॉटेल्स, ढाब्यांना पर्यटकांची पसंती मिळत असून आगाऊ बुकिंगमुळे फुल्ल झाले आहे.
मुंबई आणि आसपासच्या भागातून येणाऱ्या पर्यटकांनी सहलींचे नियोजन केले आहे. वसईच्या पश्चिम पट्ट्यात असलेल्या रिसॉर्टवरही मोठ्या प्रमाणात गर्दी होणार असल्याचे चित्र आतापासूनच दिसू लागले आहे. रविवारी होणाऱ्या जल्लोषाची चाहूल लागताच मटन, चिकन आणि मासळी विक्रेत्यांनीही मोठ्या प्रमाणात तयारी सुरू केली आहे. वसई ग्रामीण तसेच शहरी भागातील विक्रेत्यांनी अतिरिक्त माल सज्जता केली आहे. रविवारी गर्दी होण्याची शक्यता लक्षात घेऊन पोलिस प्रशासन सतर्क झाले आहे. नववर्षाच्या तीन दिवस आधीच पोलिस बंदोबस्त तैनात केला जाणार आहे.
----------------------------
तळीरामाचा हिरमोड
- उपवासाच्या दिवसांमुळे यंदाचा नववर्ष जल्लोष थोडा आधीच साजरा केला जाणार आहे. वसईच्या पूर्व, पश्चिम पट्टीला यात्रेचे रूप येणार असून उत्साह, गर्दी आणि जल्लोषाचे वातावरण अनुभवायला मिळणार आहे.
- खवय्यांसाठीही हा दिवस खास ठरणार असून नववर्षाच्या स्वागताचा आनंद रविवारीच द्विगुणित होणार आहे. पण यंदा ३१ डिसेंबरला एकादशी आल्याने तळीरामाचा हिरमोड होणार आहे.