ठाण्यात तीन गाड्यांवर कोसळले महाकाय झाड

ठाण्यात तीन गाड्यांवर कोसळले महाकाय झाड
दोन तासांच्या थरारानंतर रस्ता वाहतुकीसाठी मोकळा
ठाणे, ता. २३ : ठाण्यातील शास्त्रीनगर, पोखरण रोड क्रमांक २ येथे मंगळवारी (ता. २३) सकाळी पावणेदहाच्या सुमारास एक मोठे गुलमोहराचे झाड रस्त्यालगत उभ्या असलेल्या तीन चारचाकी गाड्यांवर कोसळले. या घटनेमुळे रस्त्याच्या दोन्ही बाजूची वाहतूक काही काळ ठप्प झाली होती. तब्बल दोन तासांच्या प्रयत्नांनंतर झाड हटवून रस्ता वाहतुकीसाठी खुला करण्यात आला.
मंगळवारी सकाळी जेव्हा रस्ता वर्दळीचा होता, तेव्हा अचानक रस्त्यालगत असलेले जुने गुलमोहराचे झाड कोसळले. हे झाड तिथे उभ्या असलेल्या तीन कारवर पडल्याने तीन वाहनांचे किरकोळ नुकसान झाले. झाड रस्त्याच्या मधोमध पडल्याने पोखरण रोडवरील वाहतुकीचा खोळंबा झाला होता. या घटनेची माहिती मिळताच वर्तकनगर पोलिस, ठाणे महानगरपालिका आपत्ती व्यवस्थापन कक्षाचे कर्मचारी, अग्निशमन दलाचे जवान आणि वृक्ष प्राधिकरण विभागाचे अधिकारी तातडीने घटनास्थळी दाखल झाले. कर्मचाऱ्यांनी कटरच्या सहाय्याने झाडाच्या फांद्या कापून बाजूला केल्या. सुमारे दोन तासांच्या अथक परिश्रमानंतर रस्ता मोकळा करण्यात आपत्ती व्यवस्थापन विभागाला यश आले.

सुदैवाने जीवितहानी टळली
झाड कोसळले तेव्हा गाड्यांमध्ये किंवा झाडाखाली कोणीही नसल्याने मोठी दुर्घटना टळली. संबंधित गाड्यांचे मात्र नुकसान झाले आहे. सध्या या भागातील वाहतूक पूर्णपणे पूर्ववत झाली असल्याची माहिती ठामपा आपत्ती व्यवस्थापन कक्षाने दिली आहे.