पारदर्शक फेरीवाला धोरण, उत्तर भारतीयांच्या हक्काचे संरक्षण

पारदर्शक फेरीवाला धोरण, उत्तर भारतीयांच्या हक्काचे संरक्षण
काँग्रेसचा उत्तर भारतीयांसाठी जाहीरनामा प्रसिद्ध
सकाळ वृत्तसेवा
मुंबई, ता. २३ : दिवाळी आणि छठपूजेसाठी जाणाऱ्यांसाठी रेल्वेस्थानकाबाहेर प्रतीक्षालये, ऑटो-टॅक्सीचालकांसाठी विश्रांती केंद्रे, उत्तर भारतीयांसाठी प्रवासी भवन तसेच उत्तर भारतीयांच्या सन्मानाचे आणि स्वयंरोजगाराचे रक्षण करण्यासह असंख्य आश्वासने मुंबई काँग्रेसने उत्तर भारतीय समुदायाला दिली आहेत. मुंबई महापालिका निवडणुकीच्या तोंडावर मुंबई काँग्रेसच्या उत्तर भारतीय सेलने सातकलमी जाहीरनामा प्रसिद्ध केला. या जाहीरम्यात अनेक आश्वासने देण्यात आली आहे.
काँग्रेसने उत्तर भारतीयांना नेहमीच आमदार, खासदार, मंत्री, महापौर पदाची संधी दिली; मात्र भाजपने केवळ उत्तर भारतीयांना मते मिळवण्यासाठी वापरून घेतल्याची टीका मुंबई काँग्रेस अध्यक्ष वर्षा गायकवाड यांनी केली. या जाहीरनाम्याचे प्रकाशन मालाड पूर्व भागातील शारदा ज्ञानपीठ इंटरनॅशनल स्कूल येथे झाले.
या वेळी काँग्रेसचे उत्तर प्रदेश प्रभारी अविनाश पांडे, उत्तर प्रदेश काँग्रेस समितीचे अध्यक्ष अजय राय उपस्‍थित होते. उत्तर भारतीय सेलचे अध्यक्ष अ‍ॅड. अवनीश तीर्थराज सिंह म्हणाले, की काँग्रेस पक्ष हा पहिला राजकीय पक्ष आहे, ज्याने उत्तर भारतीयांच्या प्रमुख मुद्द्यांना त्यांच्या निवडणूक जाहीरनाम्यात समाविष्ट केले आहे. या सेलने उत्तर भारतीयांशी ‘संवाद-मुद्द्यांवर चर्चा’ ही मोहीम राबवली.

जाहीरनाम्‍यात काय?
मुख्य आश्वासने
- फेरीवाला धोरण आणि स्मार्ट व्हेंडिंगवर भर
- टाऊन व्हेंडिंग कमिटीच्या निवडणुका पारदर्शक होणार
- पात्र विक्रेत्याला कार्ड डिजिटल परवाना
- उत्तर भारतीयांना राजकीय आणि सामाजिक संरक्षण
- ऑटो-टॅक्सीचालकांसाठी विश्रांती केंद्र, मोफत आरोग्य तपासणी
- दिवाळी, छठपूजेसाठी रेल्वेस्थानकाबाहेर प्रतीक्षालये
- यामध्ये १० ते ५० रुपयांत झोपण्याची व जेवणाची व्यवस्था
- छठपूजेसाठी समुद्रकिनाऱ्यांवर कायमस्वरूपी विसर्जन तलाव आणि घाट
- उत्तर भारतीयांसाठी प्रवासी भवन बांधणार
- तबेल्यांसाठी परवाना प्रक्रिया पारदर्शक करणार