भाजप पदाधिकाऱ्याच्या वाहनाची तोडफोड, जीवे मारण्याची धमकी!

भाजप पदाधिकाऱ्याच्या वाहनाची तोडफोड
निकालानंतर बदलापुरात राजकीय तणाव वाढला
बदलापूर, ता. २३ (बातमीदार) ः पालिका निवडणुकीचा निकाल लागून एक दिवस उलटत नाही, तोच शहरात राजकीय वादाने उग्र स्वरूप धारण केले आहे. पक्षांतराच्या रागातून शिवसेनेच्या विजयी उमेदवाराशी संबंधित व्यक्तीकडून भाजपच्या पदाधिकाऱ्याच्या वाहनाची तोडफोड करण्यात आली. तसेच जीवे ठार मारण्याची धमकी दिल्याचा गंभीर प्रकार उघडकीस आला आहे. भाजपचे पदाधिकारी राजेश परदेसी हे बॅरेज रोड, राऊत चाळ परिसरात राहतात. रात्री त्यांच्या इमारतीखाली उभ्या असलेल्या वाहनाची गुन्हेगारी पार्श्वभूमी असलेल्या सचिन खंडागळे उर्फ टकल्याने लोखंडी हत्याराने तोडफोड केली. या वेळी परदेसी यांना जीवे मारण्याची धमकी देण्यात आली. या घटनेमुळे शहरात तणावाचे वातावरण निर्माण झाले आहे.

याप्रकरणी भाजपचे गटनेते राजेंद्र घोरपडे यांनी शिवसेना शिंदे गटावर आरोप केले आहेत. सचिन खंडागळे हा शिवसेना शिंदे गटाशी संबंधित असून, निवडणुकीपूर्वीच बॅरेज रोड परिसरात त्याने दहशत माजवली होती. मतदारांना धमकावण्याचा प्रयत्न झाला, असा आरोप त्यांनी केला. निवडणुकीपूर्वी राजेश परदेसी हे शिवसेनेतून भाजपात आले. त्या काळातही त्यांचे स्थानिक पातळीवर वाद झाले होते. त्याबाबत पोलिसांत तक्रार नोंदवण्यात आली होती. तेव्हा पोलिसांनी हस्तक्षेप करून परिस्थिती नियंत्रणात आणली होती. मात्र, २१ डिसेंबरला निकाल जाहीर झाल्यानंतर, पॅनेल क्रमांक ११ अ मध्ये भाजपच्या प्रणिता कुलकर्णी यांनी सेनेच्या उमेदवाराचा पराभव केला, तर ११ ब मध्ये शिवसेनेच्या रेश्मा राठोड विजयी झाल्या. भाजपने निकाल स्वीकारला असताना, सेनेकडून मात्र पक्षांतर केलेल्या परदेसी यांच्यावर राग काढण्यात आल्याचा आरोप भाजपने केला आहे.
----
कठोर कारवाई
या हल्ल्यानंतर परदेसी यांनी पश्चिम पोलिस ठाण्यात तक्रार दाखल केली. पोलिस घटनास्थळी दाखल झाले असता आरोपी पसार झाला होता. सचिन खंडागळे हा गुन्हेगारी पार्श्वभूमीचा असून, त्याला यापूर्वी अनेकदा तडीपार करण्यात आले असल्याची माहिती वरिष्ठ पोलिस निरीक्षक किशोर शिंदे यांनी दिली. आरोपीचा शोध सुरू असून, लवकरच त्याला अटक करून कठोर कारवाई केली जाईल, असे त्यांनी स्पष्ट केले.
---
तातडीने अटक करा
शिवसेना शिंदे गटाचा गुन्हेगारी पार्श्वभूमीचा सचिन खंडागळे हा केवळ प्यादा आहे. खरा सूत्रधार संपूर्ण शहराला माहीत आहे, असा दावा राजेंद्र घोरपडे यांनी करत, सेनेवर निशाणा डागला आहे. पोलिसांनी या घटनेमागील सूत्रधारांचा शोध घ्यावा, अशी मागणी भाजपच्या विजयी उमेदवार प्रणिता कुलकर्णी यांनी केली, तर या घटनेनंतर मला व माझ्या कुटुंबाच्या जीवाला धोका असल्याचे सांगत परदेसी यांनी आरोपीला तातडीने अटक करण्याची मागणी केली आहे.