निवासस्थाने भाडे देण्यास बेस्ट कामगार संघटनेचा विरोध

‘बेस्ट’ची निवासस्थाने भाडे देण्यास कामगार संघटनेचा विरोध
मुंबई, ता. २३ : बेस्ट उपक्रमातील ३१ अधिकाऱ्यांच्या मलबार हिल येथील निवासस्थाने सोडून ती वाढीव दराने भाडे तत्त्वावर देण्याच्या प्रस्तावास बेस्ट जागृत कामगार संघटनेने विरोध केला आहे. याविरोधात न्यायालय धाव घेण्याचा इशाराही संघटनेने दिला आहे.
बेस्ट उपक्रमाच्या मालकीच्या मलबार हिल येथील वसाहतीत अधिकारी व कामगार यांची निवासस्थाने आहेत. ही घरे भाडेतत्त्वावर आहेत. या इमारतीतील रिक्त असणाऱ्या दोन सदनिका २००८ मध्ये रिलायन्स कंपनीला भाडेतत्त्वावर देण्यात आल्या. बेस्ट प्रशासनाने असंख्य सदनिका किरकोळ दुरुस्तीसाठी रिक्त ठेवल्या असून उर्वरित सदनिका, रिक्त करून भाडेतत्त्वावर देण्यासाठी निविदा काढण्यात आल्या. दरम्यान या सदनिका भाडेतत्त्वावर देण्यास बेस्ट जागृत कामगार संघटनेने तीव्र विरोध दर्शविला आहे. बेस्टच्या अत्यावश्यक सेवेतील अधिकारी, कामगार यांच्यासाठी ही घरे राखीव असताना आवश्यक त्या कायदेशीर तरतुदींचा अवलंब न करता आणि प्रतिबंधक क्षेत्र असतानाही खासगी संस्थांना ही घरे भाडेतत्त्वावर देण्याचा प्रयत्न झाला असून प्रशासनाचा हा निर्णय तातडीने रद्द करावा अशी मागी संघटनेचे सरचिटणीस सुहास नलावडे यांनी केली आहे.