वसई मध्ये नाताल कॅरनिवलची मिरवणूक

वसईमध्ये नाताल कॅरनिवलची मिरवणूक
विरार, ता. २३ (बातमीदार) ः नाताळच्या सणानिमित्ताने वसईत वातावरण रंगू लागले आहे. कुठे कॅरॅल सिंगिंगची धून ऐकू येते तर कुठे नाताल गोठ्याची तयारी सुरू झाली आहे. यातच आज वसईतील गास गावात कॅरनिवल काढण्यात आली होती.
या कॅरनिवलमध्ये उंट, घोडागाडी यांच्यासह नाताळबाबा, बँड सहभागी झाले होते. या मिरवणुकीत बँडच्या ठेक्यावर ख्रिस्ती समाजातील तरुणांनी धरलेला ठेका बघण्यासारखा होता. पारंपरिक डोक्यावर ख्रिस्ती समाजाची पारंपारिक टोपी घालून आणि धोतर सदरा घालून पुरुष यात सहभागी झाले होते, तर महिला लाल नऊवारी साडी घालून सहभागी झाल्या होत्या. या मिरवणुकीत मोठ्या प्रमाणात नागरिक सहभागी झाले होते.