कवी नारायण सुर्वे यांच्या जन्मशताब्दी निमित्त शालेय शिपाई कवी संमेलन

कवी नारायण सुर्वे यांच्या जन्मशताब्दी निमित्त शालेय शिपाई कवी संमेलन
कल्याण, ता. २४ (वार्ताहर) : मराठी साहित्यात आपल्या कवितेने श्रमिकांचा आवाज बुलंद करणारे पद्मश्री कविवर्य नारायण सुर्वे यांचे जन्मशताब्दी वर्ष सध्या सुरू आहे. या निमित्ताने, सुर्वे यांच्या स्मृतींना अभिवादन करण्यासाठी पु. ल. कट्टा या संस्थेच्या वतीने ‘शालेय शिपाई कवी संमेलन’ पार पडणार आहे.
कविवर्य नारायण सुर्वे हे काही काळ प्राथमिक शाळेत शिपाई म्हणून कार्यरत होते. याच काळात त्यांची काव्यप्रतिभा फुलली, बहरली आणि मराठी साहित्यात त्यांच्या कवितेने आपले वेगळेपण सिद्ध केले. या पार्श्वभूमीवर कोणत्याही शाळेत शिपाई म्हणून नोकरी करीत असताना कवितेची आवड जपून लेखन करणाऱ्या शिपाई कवींनी या संमेलनात सहभागी होऊन नारायण सुर्वे यांना आदरंजली व्हावी, असे आवाहन पु. ल. कट्टा संयोजक प्रा. महेंद्र भावसार यांनी केले आहे. कवींनी आपली कविता आणि अल्पपरिचय १५ जानेवारीपर्यंत कवी रमेश आव्हाड यांच्या ९३२१३३४४५१ या व्हॉट्सअप क्रमांकावर पाठवावे, असे आवाहन केले आहे.