मुलगी नकोशी झाल्याने आईकडून निर्घुण हत्या

आईकडून मुलीची हत्या
पनवेल, ता. २६ (वार्ताहर) : मातृत्वालाच काळिमा फासणारी धक्कादायक घटना कळंबोलीत उघडकीस आली आहे. एका महिलेने आपल्याच सहा वर्षांच्या मुलीची निर्घृण हत्या केल्याची घटना उघडकीस आली आहे. सुप्रिया प्रमोद म्हामुणकर (वय ३०) असे या महिलेचे नाव असून कळंबोली पोलिसांनी तिला मुलीची हत्या केल्याप्रकरणी अटक केली आहे.
पोलिसांनी दिलेल्या माहितीनुुसार सुप्रिया म्हामुणकर ही कळंबोली सेक्टर-१ ई मधील गुरूसंकल्प सोसायटीत पती व सहावर्षीय मुलगी मानसी यांच्यासह राहत होती. मृत मानसी ही इयत्ता पहिलीत शिकत होती. सुप्रियाला मुलगा हवा होता. त्यामुळे मानसीचा जन्म झाल्यापासून ती तिचा तिरस्कार करीत होती. मुलगी नीट बोलत नाही, ती कायम हिंदीत बोलते, अशी तक्रार ती पतीसमोर वारंवार करीत होती. मानसी नकोशी झाल्याने यापूर्वीही सुप्रियाने तिला मारण्याचा प्रयत्न केल्याची माहिती तपासात समोर आली आहे.