नेरळ–माथेरान रेल्वे स्थानकावर पर्स चोरी करणारा चोर रंगेहाथ पकडला; कर्जत जीआरपीच्या ताब्यात

नेरळ-माथेरान रेल्वे स्थानकात चोराला अटक
कर्जत, ता. २६ (बातमीदार) ः नेरळ-माथेरान रेल्वे स्थानकावर शुक्रवारी (ता. २६) पर्स चोरीची घटना घडली. होमगार्ड आणि जागरूक नागरिकांच्या प्रसंगावधानामुळे चोराला पकडण्यात यश आले. या घटनेमुळे काहीकाळ स्थानक परिसरात खळबळ उडाली होती.
मिळालेल्या माहितीनुसार, आज सकाळी नायशा प्रकाश वासवणी (वय ३५) या माथेरान लोकलमधून उतरून नेरळ-माथेरान रेल्वे स्थानकावर पुढील ट्रेनची वाट पाहत उभ्या होत्या. याच वेळी गर्दीचा फायदा घेत साहिल इस्राईल शेख (रा. उत्तर प्रदेश) याने त्यांच्या पर्सची चोरी केली आणि पळ काढण्याचा प्रयत्न केला. पर्स चोरी झाल्याचे लक्षात येताच स्थानकावर कर्तव्यावर असलेले होमगार्ड जवान मनीष खुणे, अरुण पाटील, संतोष म्हात्रे, सिंधू म्हात्रे व कल्पना भोपी यांनी तत्काळ धाव घेत चोराचा पाठलाग केला. काही अंतरावर जाऊन त्यांनी चोराला पकडले व त्याच्याकडून पर्स जप्त केली. त्यांच्या तत्परतेमुळे संबंधित प्रवाशाचे आर्थिक नुकसान टळले. पकडण्यात आलेल्या चोराला कर्जत जीआरपी पोलिसांच्या ताब्यात देण्यात आले आहे. पोलिसांनी त्याच्याविरोधात चोरीचा गुन्हा दाखल करण्याची प्रक्रिया सुरू केली असून पुढील तपास सुरू आहे.