कळव्यातील सर्व प्रभागातील शिवसेनेचा पॅनल विजयी होईल!

कळव्यात शिवसेनेचा पॅनल विजयी होईल
विजयी निर्धार मेळाव्यातून खासदार श्रीकांत शिंदे यांचा विश्वास
कळवा, ता. २८ (बातमीदार) ः शिवसेनेने केलेल्या कामावर व कार्यकर्त्यांच्या मेहनतीमुळे कळव्यातील शिवसेनेचे चारही प्रभागातील १६ नगरसेवक विजयी होतील, असा विश्वास खासदार डॉ. श्रीकांत शिंदे यांनी व्यक्त केला. शिवसेनेने शनिवारी (ता. २७) विजय निर्धार सभा आयोजित केली होती. यावेळी ते बोलत होते.
सध्या ठाण्यात शिवसेनेची ताकद वाढली आहे. युतीच्या जागा वाटपाच्या तिढा लवकर सुटेल व ठाणे महापालिकेसह, कल्याण-डोंबिवली, मुंबई, मीरा-भाईंदर, नवी मुंबई या सर्व महापालिकेवर भगवा फडकेल, असा विश्वास श्रीकांत शिंदे यांनी व्यक्त केला. महापालिका निवडणुकीत युतीचे उमेदवार निवडून आणण्यासाठी सर्वांनी एकत्र ताकद द्यावी, असे आवाहन त्यांनी शिवसैनिकांना केले. यावेळी कल्याण जिल्हा प्रमुख गोपाळ लांडगे व कळव्यातील चारही प्रभागातील माजी नगरसेवक व शिवसेना पदाधिकारी व कार्यकर्ते मोठ्या संख्येने उपस्थित होते.