२५ मिनिटांत तीन मोबाईल फोन

२५ मिनिटांत तीन मोबाईल फोन लंपास
घोडबंदर रोडवर धूम स्टाईल चोरी
सकाळ वृत्तसेवा
ठाणे, ता. २८ ः घोडबंदर रोडवर रिक्षाने प्रवास करणाऱ्या प्रवाशांना लक्ष करत धूम स्टाईलने चोरट्यांनी अवघ्या २५ मिनिटांत तीन प्रवाशांचे मोबाईल हिसकावून पोबारा केला आहे. या चोरीच्या घटनांमुळे प्रवाशांमध्ये भीतीचे वातावरण पसरले असून, चोरट्यांनी दीड लाख रुपयांच्या ऐवजावर डल्ला मारला आहे.
मुल्ला बागेसमोरील हायवे रोड ते पातलीपाडा ब्रिज दरम्यान गुरुवारी (ता. २५) या घटना घडल्या. या घटनांमध्ये तक्रारदार हे रिक्षाने घरी जाताना रिक्षाच्या पाठीमागून दुचाकीवरून भरधाव वेगाने आलेल्या चोरट्यांनी त्यांचे मोबाईल फोन हिसकावून पोबारा केला. या तिन्ही घटनांमध्ये एक लाख ४५ हजारांचा ऐवज चोरीला गेले आहे. याप्रकरणी भूमी सामंत, गुरवीत लोटे आणि उषाशंकर उपाध्याय यांनी चितळसर मानपाडा पोलिस ठाण्यात गुन्हा दाखल केलेल्या तक्रारीत नमूद केले झाला आहे. पुढील तपास वरिष्ठ पोलिस निरीक्षक सुनील वरुडे यांच्या मार्गदर्शनाखाली सुरू आहे.