वाडा तालुक्यात हरिनामाचा गजर

वाडा तालुक्यात हरिनामाचा गजर
भक्तिमय वातावरणात दिंड्या त्र्यंबकेश्वरकडे मार्गस्थ
वाडा, ता.८ (बातमीदार)ः श्रीसंत निवृत्तीनाथ महाराजांच्या समाधी सोहळ्यानिमित्त त्र्यंबकेश्वर येथे यात्रा आहे. त्यासाठी वाडा तालुक्यातील विविध ठिकाणांहून निघालेल्या दिंड्या गुरुवारी (ता.८) हरिनामाच्या गजरात त्र्यंबकेश्वरच्या दिशेने मार्गस्थ झाल्या.
कोंढले परिसर, पळसपाडा येथील दिंडीमध्ये पाचशेहून वारकरी सहभागी झाले आहेत. तालुक्यातून जवळपास १० हजारांच्या आसपास वारकरी निवृत्तीनाथ महाराज यांच्या यात्रेनिमित्ताने त्र्यंबकेश्वरकडे रवाना झाले. मुक्कामी कीर्तन-भजन, जागर करत दिंड्या त्र्यंबकेश्वरमध्ये दाखल होणार आहेत. तरुण-तरुणींचा दिंडीमधील वाढता सहभाग हा भारतीय संस्कृती जोपासण्याचा चांगला संकेत आहे. तरुण वर्ग भक्तिमार्गाला लागल्यामुळे त्यांच्या जीवनात आमूलाग्र बदल घडून व्यसनापासून परावृत्त होतील, असे दिंडीतील वारकऱ्यांनी सांगितले. कोंढले परिसरातील दिंडीतील वारकऱ्यांना प्रोत्साहन देण्यासाठी अंकिता दुबेले यांच्या निवासस्थानी अल्पोपाहार, चहा-पाण्याची व्यवस्था करण्यात आली होती.
----------------------------------
त्र्यंबकेश्वर येथील यात्रेसाठी १५ जानेवारीला तालुक्यातील दिंडी पोहोचणार आहेत. यामध्ये तालुक्यातील कोंढले परीसर, पळसपाडा, देवघर, नांदनी, अंभरभुई, लोहपे, खानिवली, आबिटघर, तिळसा, खरिवली तर शेजारील भिवंडी तालुक्यातील झिडके, सावरोली यांच्यासह पंधराहून अधिक दिंड्या त्र्यंबकेश्वरकडे निघाल्या आहेत. या दिंडीत ज्येष्ठ वारकऱ्यांसह तरुणवर्गही मोठ्या संख्येने सहभागी आहे.