महापालिका कार्यालयात अल्पवयीन महिला कर्मचाऱ्याचा विनयभंग

अल्पवयीन महिला कर्मचाऱ्याचा विनयभंग
भाईंदर, ता. १२ (बातमीदार) : मिरा-भाईंदर महापालिकेच्या मुख्यालयात एका अल्पवयीन महिला कर्मचाऱ्याचा विनयभंग करण्यात आल्याची धक्कादायक घटना घडली आहे. यातील आरोपी फरार असून पोलिस त्याचा शोध घेत आहेत. मिरा-भाईंदर महापालिकेच्या कार्यालयात १७ वर्षीय मुलगी कंत्राटी पद्धतीने काम करीत होती. २७ डिसेंबरला महापालिकेतील स्थायी कर्मचाऱ्याने मुलीला निवडणुकीसंबंधी फाईल स्टोअर रूममध्ये पाहण्यास सांगितली. पीडित मुलगी फाईल शोधत असताना आरोपी त्याठिकाणी आला व त्याने तिचा विनयभंग केला. त्यानंतर सोमवारी (ता. ५) आरोपीने पुन्हा एकदा पीडितेला फाईल आणण्यासाठी आपल्या घरी नेले व पुन्हा तिचा विनयभंग केला. त्यानंतर पीडितेने बुधवारी (ता. ७) भाईंदर पोलिस ठाण्यात तक्रार केली. पोलिसांनी आरोपीवर बाललैंगिक अत्याचारविरोधी कायद्यानुसार गुन्हा दाखल केला आहे.