भाजपला शिंदे गटाचा दे धक्का!

भाजपला शिंदे गटाचा ‘दे धक्का’!
अंबरनाथ नगर परिषदेवर शिवसेनेचे वर्चस्व

अंबरनाथ, ता. १२ (वार्ताहर) : गेल्या पंधरा दिवसांपासून तापलेले अंबरनाथचे राजकारण अखेर निर्णायक टप्प्यावर पोहोचले असून भाजपला शिंदे गटाने जोरदार धक्का दिला आहे. शिवसेना-राष्ट्रवादी युतीचे सदाशिव पाटील उपनगराध्यक्षपदी निवडून आले असून नगर परिषदेवर शिवसेना (शिंदे गटाने) पुन्हा आपले वर्चस्व प्रस्थापित केले. राष्ट्रवादीच्या चार नगरसेवकांना आपल्या बाजूने वळवण्यात शिवसेनेला यश आल्याने नगर परिषदेत युतीने स्पष्ट बहुमत मिळवले आहे.

अंबरनाथ नगर परिषदेच्या उपनगराध्यक्षपदासाठी रंगलेल्या अटीतटीच्या लढतीत शिवसेना आणि राष्ट्रवादी काँग्रेस (अजित पवार गट) युतीचे ज्येष्ठ नगरसेवक सदाशिव पाटील यांनी बाजी मारली आहे. नगर परिषद मुख्यालयातील सभागृहात सोमवारी (ता. १२) पार पडलेल्या निवड प्रक्रियेत पाटील यांनी भाजप पुरस्कृत महाआघाडीचे उमेदवार प्रदीप पाटील यांचा चार मतांनी पराभव केला. ​५९ सदस्यीय अंबरनाथ नगर परिषदेत कोणत्याही एका पक्षाकडे स्पष्ट बहुमत नसल्याने ही निवडणूक अत्यंत चुरशीची झाली होती. सदाशिव पाटील यांना एकूण ३२ मते मिळाली, तर प्रदीप पाटील यांना २८ मतांवर समाधान मानावे लागले. भाजपच्या १४ नगरसेवकांसह काँग्रेसचे १२, एक अपक्ष आणि नगराध्यक्षांचे मत मिळूनही भाजप-काँग्रेस आणि अंबरनाथ विकास आघाडीला विजयाचा आकडा गाठता आला नाही. उपनगराध्यक्ष म्हणून सदाशिव पाटील यांची निवड होताच खासदार डॉ. श्रीकांत शिंदे, आमदार डॉ. बालाजी किणीकर, शिवसेना शहरप्रमुख अरविंद वाळेकर, माजी नगराध्यक्ष सुनील चौधरी आदींनी त्यांचे अभिनंदन केले.

अंबरनाथ नगर परिषदेत शिवसेनेने राष्ट्रवादीशी यशस्वी हातमिळवणी करीत भाजपच्या महत्त्वाकांक्षेला लगाम लावला आहे. या निवडणुकीच्या निमित्ताने नगर परिषद मुख्यालय परिसरात मोठा पोलिस बंदोबस्त तैनात करण्यात आला होता, ज्यामुळे परिसराला पोलिस छावणीचे स्वरूप प्राप्त झाले होते. कडक सुरक्षेत पार पडलेल्या या प्रक्रियेनंतर सदाशिव पाटील यांच्या विजयाचा जल्लोष कार्यकर्त्यांनी साजरा केला. याच सभेत पाच नामनिर्देशित नगरसेवकांची नियुक्तीदेखील जाहीर करण्यात आली, ज्यामुळे नगर परिषदेतील सत्तेचे समीकरण आता पूर्णपणे स्पष्ट झाले आहे.