लाडकी बहीण मेळाव्यातून आचारसंहिता भंग

पनवेल, ता. १४ (वार्ताहर) : पनवेल महापालिका निवडणुकीच्या पार्श्वभूमीवर कळंबोलीतील प्रभाग क्रमांक ७ ते १० मध्ये लाडकी बहीण मेळाव्यातून आचारसंहितेचा भंग झाल्याचा प्रकार उघडकीस आला आहे. याप्रकरणी सहाय्यक निवडणूक निर्णय अधिकाऱ्यांनी भाजपच्या (महायुती) चार उमेदवारांविरोधात कळंबोली पोलिस ठाण्यात गुन्हा दाखल केला आहे.

आचारसंहिता भंग करणाऱ्या भाजपच्या उमेदवारांमध्ये अमर अरुण पाटील, प्रमिला रविनाथ पाटील, मनाली अमर ठाकूर आणि राजेंद्र शर्मा यांचा समावेश आहे. या चारही उमेदवारांनी सोमवारी (ता. १२) सायंकाळी ५ ते रात्री ९ या वेळेत कळंबोली सेक्टर १६ रोडपाली येथील नवीन बस डेपो येथे लाडकी बहीण मेळावा, हळदी-कुंकू तसेच लकी ड्रॉ कार्यक्रमाचे आयोजन केले होते. या वेळी उपस्थित महिलांना लकी ड्रॉच्या माध्यमातून पैठणी साडी देण्याचे प्रलोभन दाखवून मतदानाचे आवाहन करण्यात आल्याचा ठपका ठेवण्यात आला आहे. हा प्रकार थेट मतदारांवर प्रभाव टाकणारा असून, तो आचारसंहितेचा भंग असल्याचे निवडणूक यंत्रणेचे म्हणणे आहे. त्यामुळे कळंबोलीतील सहाय्यक निवडणूक निर्णय अधिकारी विनय शिपाई (वय ३९) यांनी कळंबोली पोलिस ठाण्यात तक्रार दाखल केली.