लोकलसाठी जिवाची बाजी

लोकलसाठी जीवाची बाजी
विरार स्थानकात नवीन फलाटाच्या कामामुळे गर्दी
पालघर, ता. १४ ः विरार रेल्वे स्थानकाच्या फलाट क्रमांक चारवर नवीन फलाटाचे काम सुरू आहे; पण यामुळे स्थानकात प्रवाशांची तुडुंब गर्दी होत असल्याने चेंगराचेंगरी होण्याची भीती आहे.
विरार-डहाणू चौपदरीकरणअंतर्गत नवीन तिसऱ्या-चौथ्या लोहमार्गाचे काम सुरू आहे. डिसेंबरपासून अंदाजे तीन महिन्यांसाठी विरार रेल्वे स्थानक फलाट क्रमांक-३ अ ची लांबी वाढविणे आणि नवीन होम फलाट क्रमांक-५ अ चे कार्य सुरू राहणार आहे. फलाट क्रमांक-४ अ वर प्रवाशांच्या सुरक्षेच्या दृष्टीने पत्रे लावण्यात आले आहेत. त्यामुळे जागा अत्यंत निमुळती झाली आहे. अशा परिस्थितीत विरारला फलाट क्रमांक-४ अ वर डहाणू लोकल पोहोचल्यावर उतरणाऱ्या आणि चढणाऱ्या प्रवाशांना गर्दीचा सामना करावा लागत आहे. अशा स्थितीत अपघाताची दाट शक्यता आहे.
---------------------------
रेल्वेमंत्र्यांना साकडे
- डहाणू लोकलने प्रवास करणारे ज्येष्ठ नागरिक, महिला वर्ग तसेच शालेय विद्यार्थ्यांना विविध अडचणींना सामोरे जावे लागत आहे. सकाळच्या वेळी विरारच्या पुढे वसई, भाईंदर तर थेट अंधेरीपर्यंत जाणाऱ्या कामगारांची संख्यादेखील अधिक असते.
- विरार रेल्वे स्थानक फलाट क्रमांक-३ अ चे काम पूर्ण होईपर्यंत फलाट क्रमांक-६ वरून लोकल सोडण्याची मागणी डहाणू वैतरणा प्रवासी सेवाभावी संस्थेच्या माध्यमातून पश्चिम रेल्वेचे व्यवस्थापक, खासदार हेमंत सवरा, रेल्वेमंत्र्यांकडे केली आहे.