दोन महिने पगाराची फुटकी कवडी नाही

पशुसंवर्धन विभागाचे कर्मचारी वेतनाविना
पशुचिकित्सा व्यवसायी संघटनेचे पशुसंवर्धन उपायुक्तांना निवेदन
कासा, ता. १४ (बातमीदार) ः पालघर जिल्हा परिषदेंतर्गत पशुसंवर्धन विभागातील कर्मचाऱ्यांना मागील दोन महिन्यांपासून वेतन न मिळाल्याने आर्थिक कोंडी झाली आहे. यामुळे कुटुंबाचा उदरनिर्वाह कसा करायचा, या विवंचनेत कर्मचारी सापडले आहेत. याप्रकरणी पशुचिकित्सा व्यवसायी संघटनेने पशुसंवर्धन उपायुक्तांची भेट घेत निवेदन दिले आहे.
पशुसंवर्धन विभागातील पशुधन पर्यवेक्षक व कर्मचाऱ्यांचे नोव्हेंबर आणि डिसेंबर महिन्याचे पगार न झाल्याने कर्ज, घरभाडे, मुलांचे शिक्षण, औषधोपचार यांसारख्या खर्चांवर गंभीर परिणाम झाल्याची भावना व्यक्त होत आहे. यासाठी पशुचिकित्सा व्यवसायी संघटनेने काही दिवसांपूर्वी जिल्हा परिषदेच्या पशुसंवर्धन उपायुक्तांची भेट घेत विविध मागण्या केल्या होत्या. वेतनासह अन्य प्रलंबित देयके तत्काळ अदा करावीत, सर्व मागण्यांचा सहानुभूतीपूर्वक विचार करून त्या त्वरित निकाली काढाव्यात, अशी मागणी संघटनेचे केल्या होत्या, तर मागण्या पूर्ण न झाल्यास असहकार आंदोलन छेडण्याचा इशाराही कर्मचाऱ्यांनी दिला आहे.