पंचायतराज अभियानात स्वच्छता उपक्रम

पंचायत राज अभियानात स्वच्छता उपक्रम
अलिबाग (वार्ताहर) : मुख्यमंत्री समृद्ध पंचायत राज अभियानांतर्गत रायगड जिल्हा परिषद विविध उपक्रम राबवत असून, त्याचा एक भाग म्हणून जिल्ह्यातील ग्रामपंचायती, शाळा, अंगणवाडी व प्राथमिक आरोग्य केंद्रांमध्ये शुक्रवारी (ता. १६) सामूहिक स्वच्छता मोहीम राबविण्यात येणार आहे. परिसर स्वच्छतेमुळे रोगराईला आळा बसतो, याची जाणीव करून देत या मोहिमेत प्लॅस्टिक, ओला-सुका कचरा संकलन व त्याचे योग्य व्यवस्थापन यावर भर राहणार आहे. तालुका व ग्रामपंचायत स्तरावरील अधिकारी-कर्मचाऱ्यांसह नागरिकांनी सहभाग घेऊन गाव स्वच्छ-सुंदर करण्याचे आवाहन मुख्य कार्यकारी अधिकारी नेहा भोसले व उपमुख्य कार्यकारी अधिकारी विशाल तनपुरे यांनी केले.
--------------------------
सुनील शेडगे यांचे निधन
खालापूर (बातमीदार) : खोपोली येथील पत्रकार सारिका सावंत यांचे वडील सुनील शेडगे यांचे हृदयविकाराच्या झटक्याने अकस्मात निधन झाले. मृत्यूसमयी त्यांचे वय ६१ वर्ष होते. संघर्षशील आणि हरहुन्नरी स्वभावाचे शेडगे यांची आई गिरणी कामगार होती व त्या काळात गिरणी कामगारांचे प्रतिनिधित्व त्यांनी केले होते. आईच्या सामाजिक कार्याचा वारसा शेडगे यांनी पुढे नेला. अंत्यसंस्कारासाठी राजकीय, शैक्षणिक व सामाजिक क्षेत्रातील मान्यवर उपस्थित होते. त्यांच्या पश्चात पत्नी, मुलगा, मुलगी, सून व नातवंडे असा परिवार आहे.