प्रचार संपताच रात्रभर राजकीय कार्यकर्त्यांचा गोंधळ

राजकीय पक्षांमध्ये आरोपांच्या फैरी
नालासोपारा, ता. १४ (बातमीदार) ः वसई-विरार महापालिका निवडणुकीचा प्रचार थंडावल्यानंतर राजयकीय पक्षांमध्ये पैसेवाटपावरून आरोप-प्रत्यारोप सुरू झाले आहेत. वसई, नालासोपारा पूर्वपट्टीत बहुजन विकास आघाडी आणि भाजप, मनसेच्या कार्यकर्त्यांचा मंगळवारी रात्रभर गोंधळ पाहायला मिळाला. एका वॉर्डात बविआ, तर दुसऱ्या वॉर्डात भाजप, सेना पैसेवाटप करत असल्याच्या संशयावरून रात्रभर वाद-विवाद सुरू होते.
वॉर्ड क्रमांक १९,२०,८,०१,२७ मध्ये रात्रभर राजकीय पक्षांच्या कार्यकर्त्यांनी जागता पहारा दिला. थोडाही संशयित दिसला की एकत्रच घोळक्याने जाऊन त्याला अडवून, त्याची सर्व झाडाझडती घेण्यात येत होती. वसई फाटा, गंगाडपाडा, नालासोपारा पूर्व संतोषभूवन, धणीवबाग या परिसरात मध्यरात्री मतदारांना मोठा गाेंधळ पाहायला मिळाला. रात्री घडलेल्या सर्व घटनांचे व्हिडिओ बुधवारी दिवसभर समाजमाध्यमांवर प्रसारित झाल्याने याबाबत चर्चांना उधाण आले होते.