कर्जत येथे ‘रायकॉन २०२६’

कर्जत येथे ‘रायकॉन २०२६’
कर्जत, ता. १५ (बातमीदार) : रायगड मेडिकल असोसिएशनचे वार्षिक अधिवेशन ‘रायकॉन २०२६’ हे १० व ११ जानेवारी रोजी कर्जत येथील साल्ट ओलेंडर फार्म येथे उत्साहात पार पडले. दोन दिवस चाललेल्या या अधिवेशनाचे अध्यक्षस्थान डॉ. आशुतोष कुलकर्णी यांनी भूषवले. उद्घाटनप्रसंगी आमदार महेंद्र थोरवे व इतिहास संशोधक डॉ. कुरुष दलाल प्रमुख पाहुणे होते. रायगड जिल्ह्यातील सुमारे ७०० डॉक्टरांनी उपस्थिती लावली.
अधिवेशनाचे आयोजन डॉ. आशुतोष कुलकर्णी, सचिव डॉ. प्रशांत गांगल, खजिनदार डॉ. कुमार ओसवाल तसेच कर्जत मेडिकल असोसिएशनसह सर्व पदाधिकाऱ्यांनी केले. या वेळी संपादक डॉ. दिलीप सावळे यांच्या स्मरणिकेचे प्रकाशन करण्यात आले. कॅन्सर, स्त्रीरोग, आयुर्वेद, हृदयरोग, मेंदूविकार आदी विषयांवर विविध तज्ज्ञांनी व्याख्याने दिली.
अधिवेशनासाठी डॉ. प्रेमचंद जैन, डॉ. गणेश साळुंखे, डॉ. श्रीपाल जैन, डॉ. गजानन चव्हाण यांच्यासह अनेकांनी परिश्रम घेतले. सूत्रसंचालन डॉ. शर्वाणी कुलकर्णी, डॉ. कुणाल राठोड व डॉ. अनिरुद्ध जोशी यांनी केले. वैद्यकीय ज्ञानवृद्धी व परस्पर संवादासाठी अधिवेशन उपयुक्त ठरल्याचे मत डॉक्टरांनी व्यक्त केले.