मतदानाच्या अवघ्या एक तासांत पुसली गेली बोटावरची शाई

मतदानानंतर बोटावरील शाई पुसली
सामाजिक कार्यकर्ते श्रीनिवास घाणेकर यांच्या सोबत प्रकार
कल्याण, ता. १५ (वार्ताहर) : कल्याण-डोंबिवलीतील मतदानाचा दिवस चांगलाच गाजला आहे. मतदान यंत्रांतील बिघाड, मतदार याद्यांमधील गोंधळ आणि बोटावरची शाई पुसली जाण्याचे प्रकार घडल्याने मतदारांनी संताप व्यक्त केला आहे.
कल्याणमध्ये सामाजिक कार्यकर्ते श्रीनिवास घाणेकर यांच्या बोटावरील शाई पुसली गेल्याचा प्रकार समोर आला आहे. मतदान केल्याच्या अवघ्या एका तासानंतर साबणाने हात धुतला असता घाणेकर यांच्या बोटावरील शाई पुसली गेली. हा आयोगाचा भोंगळ कारभार असल्याची टीका घाणेकर यांनी केली आहे. यामुळे दुबार मतदान होण्याची शक्यता घाणेकर यांनी वर्तवली आहे. असेच शाई पुसण्याचे प्रकार कल्याण-डोंबिवलीतील घडले असून, नागरिकांमध्ये संतापाचे वातावरण आहे.