विहिरीत पडलेल्या तरुणाचा मृत्यू

विहिरीत पडलेल्या तरुणाचा मृत्यू
सकाळ वृत्तसेवा
ठाणे, ता. १८ : शशिकांत नाकोडी (२०) हा तरुण विहिरीत पडल्याची घटना रविवारी (ता. १८) मध्यरात्री २ वाजण्याच्या सुमारास समोर आली. या घटनेत त्या तरुणाला बाहेर काढून उपचारार्थ खासगी रुग्णालयात नेल्यावर तेथील वैद्यकीय अधिकाऱ्यांनी त्याला मृत घोषित केल्याची माहिती ठाणे महापालिका आपत्ती व्यवस्थापन कक्षेचे अधिकारी यासिन तडवी यांनी दिली. पातलीपाड्यातील तुरपेपाडा येथील एका विहिरीत तरुण पडला असल्याची माहिती पोलिस हवालदार दीपक ठाकरे यांनी ठामपा आपत्ती व्यवस्थापन कक्षेला दिली. त्या घटनेची माहिती मिळताच घटनास्थळी अग्निशमन दलाच्या जवानांसह आपत्ती व्यवस्थापन कक्षेच्या कर्मचाऱ्यांनी धाव घेत त्या तरुणाला २५ ते ३० फूट खाली विहिरीतून बाहेर काढले. तसेच कासारवडवली पोलिसांच्या उपस्थितीत त्याला खासगी रुग्णालयात उपचारार्थ दाखल केले. त्या वेळी तेथील डॉक्टरांनी त्याला मृत घोषित केले.