डॉ. पतंगराव कदम महाविद्यालयात विशेष व्याख्यान

डॉ. पतंगराव कदम महाविद्यालयात विशेष व्याख्यान
पेण, ता. २० (वार्ताहर) : डॉ. पतंगराव कदम कला व वाणिज्य महाविद्यालयात स्वामी विवेकानंद जयंती सप्ताहानिमित्त ग्रंथालय विभागाच्या वतीने विशेष व्याख्यानाचे आयोजन करण्यात आले. या कार्यक्रमासाठी तज्ज्ञ वक्ते म्हणून डॉ. रमाकांत नवघरे यांनी उपस्थित राहून विद्यार्थ्यांना स्मार्टफोनचा सुरक्षित, योग्य आणि प्रभावी वापर कसा करावा, याबाबत सखोल मार्गदर्शन केले.
स्मार्टफोनच्या अतिवापरामुळे उद्भवणारे धोके, डेटा सुरक्षिततेचे महत्त्व, आर्थिक व वैयक्तिक नुकसान टाळण्यासाठी आवश्यक सेटिंग्ज आणि सावधगिरीचे उपाय याविषयी त्यांनी सविस्तर माहिती दिली. विद्यार्थ्यांनीही या विषयाला उत्स्फूर्त प्रतिसाद दिला.
या वेळी प्राचार्य डॉ. मुरलीधर वाघ यांनी अशा उपक्रमामुळे विद्यार्थ्यांमध्ये तंत्रज्ञानाचा जबाबदारीने आणि सुयोग्य वापर करण्याची जाणीव निर्माण होते, असे मत व्यक्त केले. कार्यक्रमाचे प्रास्ताविक ग्रंथपाल मंगेश भित्रे, सूत्रसंचालन प्रा. लक्ष्मण कुमारे तर आभार प्रदर्शन डॉ. श्रीकांत महादाने यांनी केले. कार्यक्रमास शिक्षक व शिक्षकेतर कर्मचारी उपस्थित होते.