पर्यावरणपूरक मूर्तींकडे भाविकांचा कल

पर्यावरणपूरक मूर्तींकडे भाविकांचा कल
ठाण्यात माघी गणेशोत्सवाचा उत्साह
ठाणे, ता. २१ (बातमीदार) : माघ महिन्यात साजऱ्या होणाऱ्या गणेश जयंतीचे वेध ठाणेकरांना लागले असून शहरात सर्वत्र भक्तिमय वातावरण निर्माण झाले आहे. गुरुवारी (ता. २२) बाप्पाचे आगमन होणार असून मूर्ती खरेदीसाठी बाजारपेठेत भाविकांची मोठी लगबग पाहायला मिळत आहे. यंदा भाविकांनी भव्यतेपेक्षा सुबकतेवर आणि विशेषतः पर्यावरणपूरक मूर्तींवर भर दिला आहे.

माघी गणेशोत्सव प्रामुख्याने घरगुती स्वरूपाचा असल्याने छोट्या आणि साध्या मूर्तींना मोठी मागणी आहे. स्वामी समर्थ रूप, लालबागचा राजा, टाळ वाजवणारा गणपती अशा रूपातील मूर्तींनी भाविकांचे लक्ष वेधून घेतले आहे. भाद्रपदातील गणेशोत्सवाच्या तुलनेत माघी गणपतींची संख्या मर्यादित असते. यामुळे मूर्तिकारांना प्रत्येक मूर्तीवर बारकाईने काम करण्यासाठी पुरेसा वेळ मिळतो. परिणामी, यंदा अतिशय सुबक आणि दर्जेदार मूर्ती बाजारात उपलब्ध झाल्या आहेत. सध्या कार्यशाळांमध्ये मूर्तींना अंतिम रूप देण्याचे काम युद्धपातळीवर सुरू आहे.

स्थानिक मूर्तिकारांसमोर आव्हाने
यंदा मूर्तींच्या किमतीत वाढ झालेली नसली तरी स्थानिक कलाकारांना व्यावसायिक अडचणींचा सामना करावा लागत आहे. यावर मूर्तिकार आदित्य हिंदळेकर यांनी खंत व्यक्त केली. अनेक मूर्तिकार पेणवरून मोठ्या प्रमाणात तयार मूर्ती आणून स्वस्त दरात विकतात. यामुळे हाताने मेहनत घेऊन मूर्ती घडवणाऱ्या स्थानिक मूर्तिकारांच्या रोजगारावर आणि आर्थिक गणितावर मोठा परिणाम होत आहे.