भारत पेट्रोलियमच्या करोत्तर नफ्यात वाढ

भारत पेट्रोलियमच्या करोत्तर नफ्यात वाढ

मुंबई, ता. २९ : कच्चे तेल उत्पादन आणि शुद्धीकरण क्षेत्रातील सरकारी कंपनी भारत पेट्रोलियमचा या तिमाहीतील नफा ६२ टक्क्यांनी वाढला आहे. त्यांना नुकत्याच संपलेल्या तिमाहीत एक लाख ३६ हजार कोटी रुपयांचा महसूल मिळाला, तर डिसेंबरअखेर संपलेल्या नऊ महिन्यांत त्यांना तीन लाख ८७ हजार कोटी रुपये महसूल मिळाला. या तिमाहीत कंपनीला ७,५४५ कोटी रुपये करोत्तर नफा मिळाला. हा नफा मागील वर्षीच्या याच तिमाहीपेक्षा ६२ टक्क्यांनी जास्त आहे. गेल्या वर्षीच्या याच तिमाहीत त्यांना ४,६४९ कोटी रुपये नफा मिळाला होता.
डिसेंबर अखेरपर्यंतच्या नऊ महिन्यांसाठी कंपनीने २० हजार कोटी रुपयांपेक्षा जास्त करोत्तर नफा मिळवला. मागील वर्षीच्या याच नऊ महिन्यांत हा नफा १० हजार कोटी रुपये होता. त्यापेक्षा दुप्पट नफा त्यांनी आता मिळवला आहे. कंपनीने १० रुपयांचा हंगामी लाभांश जाहीर केला आहे. त्यामुळे या आर्थिक वर्षातील त्यांचा एकूण लाभांश १७ रुपये ५० पैसे झाला आहे. उत्कृष्ट कामकाज, कार्यक्षम पणन व्यवस्था आणि मजबूत विक्री या आधारावर कंपनीने ही कामगिरी केली आहे.