घाटकोपर पूर्वेतील लक्ष्मण नगर प्रशासनाकडून दुर्लक्षित

घाटकोपर पूर्वेतील लक्ष्मण नगर प्रशासनाकडून दुर्लक्षित
आठ वर्षांपासून रहिवासी विविध समस्यांनी त्रस्त
घाटकोपर, ता. २ (बातमीदार) : घाटकोपर पूर्वेतील राजावाडी परिसरातील लक्ष्मण नगर येथील रहिवासी गेल्या तब्बल आठ वर्षांपासून विविध नागरी समस्यांना सामोरे जात आहेत. वारंवार तक्रारी करूनही प्रशासनाकडून ठोस उपाययोजना होत नसल्याने नागरिकांमध्ये तीव्र नाराजी व्यक्त होत आहे. या पार्श्वभूमीवर रहिवाशांनी माजी आमदार व माजी मंत्री प्रकाश मेहता यांच्याकडे आपली व्यथा मांडली आहे.
लक्ष्मण नगर परिसरात हजारो नागरिक वास्तव्यास असून, झाडांच्या वाढलेल्या फांद्या थेट घरांमध्ये शिरत आहेत. तसेच गटारांची नियमित स्वच्छता न झाल्याने सांडपाणी रस्त्यावर साचत असून परिसरात तीव्र दुर्गंधी पसरली आहे. परिणामी नागरिकांच्या आरोग्याचा प्रश्न गंभीर बनला असल्याची तक्रार करण्यात येत आहे. याशिवाय परिसरातील अंतर्गत रस्त्यांची मोठ्या प्रमाणावर दुरवस्था झाली असून, कचरा संकलनही वेळेवर होत नसल्याने नागरिकांना मोठ्या गैरसोयींना सामोरे जावे लागत आहे. “ही समस्या एखाद-दोन दिवसांची नसून गेली आठ वर्षे आम्ही याच परिस्थितीत जगत आहोत,” अशी प्रतिक्रिया रहिवासी रिटू चंदेरीया यांनी व्यक्त केली.

माजी मंत्री प्रकाश मेहता यांनी सहाय्यक आयुक्तांसह केली पाहणी
लक्ष्मण नगरमधील गंभीर समस्यांची दखल घेत माजी मंत्री प्रकाश मेहता यांनी एन विभागाचे सहाय्यक आयुक्त गजानन बेल्लाळे यांच्यासह परिसराची प्रत्यक्ष पाहणी केली. या वेळी रहिवाशांनी आपल्या समस्या अधिकाऱ्यांसमोर मांडल्या. पाहणीनंतर सहाय्यक आयुक्त गजानन बेल्लाळे यांनी सर्व तक्रारी गांभीर्याने घेऊन तातडीने आवश्यक उपाययोजना करण्यात येतील, असे आश्वासन दिले.