शोभिवंत मासेपालन युवक-महिलांसाठी उत्पन्नाचा प्रभावी स्रोत : डॉ. केदार मोहंता

शोभिवंत मासेपालन युवक-महिलांसाठी उत्पन्नाचा प्रभावी स्रोत : डॉ. केदार मोहंता
कोसबाड कृषी विज्ञान केंद्रात प्रशिक्षण कार्यक्रमाचे उद्‍घाटन
वाणगाव, ता. १० (बातमीदार) : शोभिवंत मासे पालन हा अल्प जागेत, कमी पाण्यात व मर्यादित भांडवलात सुरू करता येणारा व्यवसाय असून, युवक व महिलांसाठी तो प्रभावी उत्पन्नाचा स्रोत ठरू शकतो, असे प्रतिपादन भारतीय कृषी अनुसंधान परिषद अंतर्गत मुंबई येथील केंद्रीय मत्स्य शिक्षण संस्थेचे मत्स्य खाद्य विभागप्रमुख डॉ. केदार मोहंता यांनी केले. कोसबाड येथील कृषी विज्ञान केंद्रात आयोजित शोभिवंत मासे पालन प्रशिक्षण कार्यक्रमाच्या उद्‍घाटनप्रसंगी ते बोलत होते.
ग्रामीण युवक, महिला व शेतकऱ्यांना स्वयंरोजगाराच्या संधी उपलब्ध करून देण्यासाठी या प्रशिक्षणाचे आयोजन करण्यात आले आहे. प्रशिक्षण समन्वयक डॉ. सिकेंदर यांनी शोभिवंत माशांच्या जाती, टँक रचना, पाण्याची गुणवत्ता, खाद्य व्यवस्थापन, रोग नियंत्रण, प्रजनन तंत्रज्ञान तसेच बाजारपेठ व विक्री व्यवस्थापनाबाबत सविस्तर मार्गदर्शन केले जाणार असल्याचे सांगितले.
कार्यक्रमाच्या प्रास्ताविकात कृषी विज्ञान केंद्राचे प्रमुख शास्त्रज्ञ डॉ. विलास जाधव यांनी कृषी विज्ञान केंद्राच्या विविध उपक्रमांची माहिती देऊन शोभिवंत मत्स्यपालन या कार्यक्रमामुळे ग्रामीण भागात मत्स्यव्यवसायाच्या नव्या संधी निर्माण होऊन युवकांचे स्थलांतर रोखण्यास मदत होईल, तसेच महिलांना आर्थिकदृष्ट्या सक्षम बनविण्यास चालना मिळेल, असा विश्वास व्यक्त करण्यात आला. कृषी विज्ञान केंद्राच्या या उपक्रमामुळे शेतीपूरक व्यवसायांना गती मिळून शाश्वत ग्रामीण विकासास हातभार लागेल, असे मत सहभागी युवकांनी व्यक्त केले.