तहसीलदार विजय तळेकर एमआयडीसीत महाव्यवस्थापक

विजय तळेकर यांची एमआयडीसीच्या
महाव्यवस्थापकपदी नियुक्ती

पनवेल, ता. १० (बातमीदार) ः महाराष्ट्र शासनाच्या उद्योग, ऊर्जा, कामगार व खनिकर्म विभागाच्या आदेशानुसार तहसीलदार विजय शिवाजीराव तळेकर यांची महाराष्ट्र औद्योगिक विकास महामंडळ (एमआयडीसी), मुंबई येथे महाव्यवस्थापक (विशेष प्रकल्प) या पदावर प्रतिनियुक्ती करण्यात आली आहे. महसूल व वन विभागाच्या शिफारशीवरून ही नियुक्ती करण्यात आली आहे. संबंधित नियम व अटींनुसार त्यांची सेवा उद्योग विभागाकडे सुपूर्द करण्यात आली आहे. ही प्रतिनियुक्ती पुढील तीन वर्षांसाठी किंवा पुढील आदेशापर्यंत लागू राहणार आहे.
पनवेल येथे तहसीलदार म्हणून कार्यरत असताना विजय तळेकर यांनी प्रभावीपणे कार्यभार सांभाळत प्रशासनात वेगळी छाप निर्माण केली होती. त्यांच्या कार्यकाळात घेतलेल्या निर्णयांचा ठसा आजही पनवेलकरांच्या मनामध्ये कायम आहे. महसूल खात्यातील त्यांच्या उत्कृष्ट कामगिरीबद्दल विविध नामांकित संस्थांकडून त्यांना सन्मानित करण्यात आले आहे.