पथदर्शक फलकांवर फुकट्या जाहिराती

पथदर्शक फलकांवर फुकट्या जाहिराती
नागरिकांकडून कारवाईची मागणी
मालाड, ता. १० (बातमीदार) : मालाड पश्चिमेतील मार्वे रोड ते चारकोप-कांदिवली जोडणाऱ्या मार्गावरील पथदर्शक फलकांवर अनधिकृत जाहिराती चिटकवण्याचे प्रकार वाढले आहेत. सार्वजनिक फलक, विजेचे बॉक्स, बेस्ट थांबे, उद्याने आदी ठिकाणी जाहिराती लावून काही जण मोफत प्रचार करत सार्वजनिक मालमत्तेचे नुकसान करत असल्याचे दिसून येत आहे.
या प्रकाराबाबत अनेक सामाजिक संस्था व संघटनांनी पालिकेकडे तक्रारी करून कारवाईची मागणी केली आहे. मात्र, पालिकेच्या पी उत्तर विभागातील अनुज्ञापन खात्याकडून या प्रकाराकडे दुर्लक्ष होत असल्याचा आरोप नागरिकांकडून करण्यात येत आहे.
अनधिकृत जाहिरातबाजांमुळे सार्वजनिक ठिकाणी अस्वच्छता वाढत असून “स्वच्छ मुंबई” अभियानालाही तडा जात असल्याचे नागरिकांचे म्हणणे आहे. तसेच सार्वजनिक मालमत्तेचे विद्रूपीकरण होत असल्याने अशा जाहिरातींवर तातडीने कारवाई करून त्या हटवाव्यात, अशी मागणी नागरिकांनी पालिकेकडे केली आहे.