बॅंक ऑफ महाराष्ट्रच्या गृह कर्जाच्या व्याज दरात कपात

पुणे, ता. १३ ः देशाच्या सार्वजनिक बँकिंग क्षेत्रातील एक अग्रगण्य बँक असलेल्या ‘बँक ऑफ महाराष्ट्र’ने १३ मार्चपासून गृह कर्जावरील व्याजदरात कपात केली आहे. आता गृह कर्ज ८.४० टक्के या नवीन व्याज दराने मिळेल.
हा व्याजदर बँकिंग उद्योगात सर्वांत कमी आहे. बँकेने निमलष्करी दलांसह देशाच्या संरक्षण दलातील कर्मचाऱ्यांसाठी विशेष दर निश्चित केला असून वेतन व निवृत्तिवेतन संवर्गातील कर्जदारांच्या गृह कर्जांना या घटलेल्या व्याज दराचा लाभ होणार आहे. फेस्टिवल धमाका ऑफरअंतर्गत बँक ऑफ महाराष्ट्रने सुवर्ण, गृह व चारचाकी वाहन कर्जावरील प्रक्रिया शुल्क माफ केले आहे. बँक ऑफ महाराष्ट्राने कर्जासाठी सर्वांत आकर्षक व्याजदर देऊ केला आहे. त्यामुळे कर्जदारांचा फायदा होणार आहे.