अखेर मुख्य दांड आपटे रस्ता दुरुस्त

रसायनी, ता. २३ (बातमीदार) : रसायनीतील मुख्य दांड आपटे रस्त्यावरील खड्डे बुजवण्यात आले आहे. तसेच सेबी फाट्यावर साईडपट्टीचे दुरुस्तीचे काम करण्यात आल्याने वाहतुकीस काहीसा दिलासा मिळाला आहे. यामुळे वाहनचालक समाधान व्यक्त करत आहेत.
रसायनीतील मुख्य रस्त्यावर ठिकठिकाणी खड्डे पडून रस्त्याची दुरवस्था झाली होती. वाहनचालकांनाही खड्डे चुकवताना तारेवरची कसरत करावी लगत होती. अपघाताचे प्रमाण वाढण्याची शक्यता होती. त्यामुळे वाहनचालक नाराजी व्यक्त करत होते. रस्त्यावरील खड्डे लवकरात लवकर बुजवण्यात यावेत, अशी मागणी करण्यात आली होती. या मागणीचा मागणीचा सम्यक सामाजिक संस्था आणि इतर संस्थानी सातत्याने पाठपुरावा केला होता. रस्त्याची दुरुस्ती तत्काळ न केल्यास रसायनीचे मुख्यालय वासांबे येथे सर्वपक्षीय पदाधिकारी, सामाजिक संघटना, रिक्षा चालक-मालक संघटना आदींनी सार्वजनिक बांधकाम विभागाविरोधात आंदोलनाचा इशारा दिला होता. सेबी फाट्यावरील साईडपट्टी खचल्याची बातमी ‘सकाळ’ने शुक्रवारी (ता. २१) प्रसिद्धही केली होती.
घटनेचे गांभीर्य लक्षात घेताच मुख्य रस्त्यावरील आणि रसायनी फाटापर्यंत ठिकठिकाणी पडलेले खड्डे बुजवण्यात आले आहे. सेबी फाट्यावर साईडपट्टीचे खचलेल्या ठिकाणी दुरुस्ती काम करण्यात आले आहे. दरम्यान, रसायनी फाटा नारपोली दरम्यान रस्त्यावरील खड्डे बुजवण्याचे काम सुरू असल्याने नागरिक समाधान व्यक्त करत आहे.