Ulhasnagar News : महानगरपालिकेला तीन टप्प्यातील अभययोजना फळली; 126 कोटी 10 लाख वसुलीचा नवा उच्चांक

उल्हासनगर - महानगरपालिका आयुक्त मनीषा आव्हाळे यांनी उल्हासनगरकरांसाठी मालमत्ता कर भरण्यासाठी तीन टप्प्यात लागू केलेली अभययोजना कमालीची फळली आहे. मागील 112 कोटी रुपयांचा रेकॉर्ड ब्रेक करून एकूण 126 कोटी 10 लाख रुपयांच्या वसुलीचा नवा उच्चांक गाठण्यात आला आहे. त्यामुळे महानगरपालिकेच्या विस्कटलेल्या आर्थिक घडीला आधार मिळण्याची शक्यता निर्माण झाली आहे.

सुरवातीला आयुक्त मनीषा आव्हाळे यांची अभययोजनेबाबत नकारघंटा होती. मात्र लोकप्रतिनिधींच्या आग्रहास्तव मनीषा आव्हाळे यांनी 24 फेब्रुवारी ते 22 मार्च या तीन टप्प्यात अभययोजना लागू केली होती. तत्पूर्वी तत्कालीन आयुक्त अजीज शेख यांच्या मार्गदर्शनाखाली कर निर्धारक व संकलक निलम कदम यांच्या टीमने 23 फेब्रुवारी पर्यंत 74 कोटी 56 लाख रुपये वसूल केलेले होते.

अभय योजनेच्या या तिन्ही टप्प्यात 25 हजार 510 लाभार्थींनी 51 कोटी 56 लाख रुपये भरल्याने सर्व मिळून एकूण वसुली ही 126 कोटी 10 लाख रुपये झाली आहे. ही महानगरपालिकेच्या स्थापनेपासूनच्या इतिहासात आजमिती पर्यंतची सर्वाधिक रेकॉर्ड ब्रेकची आकडेवारी ठरली आहे.

2023-24 मध्ये तत्कालीन आयुक्त अजीज शेख, अतिरिक्त आयुक्त जमीर लेंगरेकर, उपायुक्त प्रियंका राजपूत यांनी 112 कोटी रुपये वसुलीचा रेकॉर्ड प्रस्थापित केला होता. विशेष म्हणजे 24 फेब्रुवारी ते 6 मार्च या दरम्यान 100 टक्के व्याज व दंड माफीच्या पहिल्या टप्यातील 11 दिवसातच 117 कोटींच्या वर वसुली झाल्याने मागील वर्षाचा 112 कोटी रुपयांचा रेकॉर्ड ब्रेक झालेला होता.

आता 14 कोटी अधिक वसुली झाल्याने 126 कोटींच्या वरचा टप्पा गाठण्यात आला आहे. 31 मार्च एंडला काही दिवस शिल्लक असल्याने आणखीन किती आकडेवारीची वाढ होणार, हे देखील स्पष्ट होणार आहे.

दरम्यान प्रशासक तथा आयुक्त मनीषा आव्हाळे यांच्या आदेशान्वये व अतिरिक्त आयुक्त किशोर गवस यांच्या मार्गदर्शनाखाली मालमत्ता कर विभागाच्या कर निर्धारक व संकलक निलम कदम यांच्या टीमने रेकॉर्डब्रेक वसुलीचा उच्चांक निर्माण केला आहे.