महामुंबईच्या प्रवाशांची प्रतिक्षा संपणार? लवकरच सर्वांसाठी लोकल ट्रेन सुरू होण्याची शक्यता

मुंबई - महामुंबईतील सर्वसामान्य चाकरमान्यांसाठी लोकल ट्रेन कधी सुरू होणार असा सवाल प्रवाशांकडून केला जात आहे. दिवाळी नंतर कोरोना संसर्गाची स्थिती लक्षात घेऊन हा निर्णय घेतला जाणार असल्याची माहिती मिळत होती. आता मुंबईकरांसाठी 15 डिसेंबर नंतर लोकल ट्रेन सुरू होण्याची शक्यता व्यक्त केली जात आहे.

हेही वाचा - लोकंहो सावधान! कोरोनामुळे रुग्णांच्या मृत्यूचा आकडा पुन्हा वाढला

कोरोना संसर्गाच्या पार्श्वभूमीवर सर्वसामान्यांच्या प्रवासासाठी मुंबईची लोकल ट्रेन बंद करण्यात आली होती. अत्यावश्यक सेवेतील कर्मचारी, महिलांना लोकल प्रवासाची मुभा देण्यात आली आहे. परंतु सर्वांसाठी लोकल प्रवास कधी सुरू होणार हा प्रश्न अद्यापही प्रलंबित आहे. मुंबई महापालिकेचे आयुक्त इक्बालसिंह चहल यांनी दिवाळी नंतर कोरोना संसर्गाची स्थिती लक्षात घेऊन लोकल सर्वांसाठी सुरू करण्याचा निर्णय घेण्यात येईल असे म्हटले होते.

हेही वाचा - लॉकडाऊनमध्येही IIT ची पोरं मालामाल; प्लेसमेंटमध्ये विद्यार्थ्यांना कोटींचे पॅकेज

दिवाळीत नागरिकांनी बाजारपेठांमध्ये खरेदीसाठी गर्दी केली होती. त्यामुळे दिवाळी नंतर पुन्हा कोरोना संसर्ग वाढण्याची भीती व्यक्त केली जात होती. त्यामुळे 15 डिसेंबर पर्यंत कोरोना संसर्गाचा आकडा स्थिर राहिल्यास मुंबईतील लोकल ट्रेन सर्वसामान्यांसाठी सुरू करण्याबाबत निर्णय घेण्यात येणार होता. सध्या मुंबईतील कोरोना संसर्गाचा आकडा जवळपास स्थिर असल्याचे चित्र आहे. त्यामुळे 15 डिसेंबर नंतर सर्वांसाठी लोकल ट्रेन सुरू करण्याच्या दृष्टीने लवकरच प्रशासकीय पातळीवर तयारी सुरू असल्याची माहिती मिळत आहे. यासंबधीचा निर्णय 10 ते 12 डिसेंबरदरम्यानच्या महत्वाच्या बैठकीत होण्याची शक्यता व्यक्त करण्यात येत आहे. त्यामुळे सर्वांसाठी लोकल ट्रेनची प्रतिक्षा लवकरच संपणार असल्याचे चिन्ह आहेत.