मुंबई : कोविड 19 चा धोका तर प्रत्येकालाच आहे. पण स्वतःला सुरक्षित ठेवण्याचा अधिकार ज्येष्ठ नागरिकांसह प्रत्येकाला द्यायला हवा, असा अभिप्राय मुंबई उच्च न्यायालयाने व्यक्त केला आहे. दरम्यान, पासष्ठ वर्षावरील कलाकारांवर असलेले मनाईचे बंधन तात्पुरते असून लवकरच त्यावर फेरविचार होणार आहे, अशी माहिती राज्य सरकारच्या वतीने आज देण्यात आली.
राज्य सरकारने मिशन बिगीन अगेन मोहीमेअंतर्गत जारी केलेल्या मार्गदर्शक तत्वांमध्ये पासष्ट वर्षावरील कलाकारांना सिनेमा आणि मालिकांच्या सेटवर जाण्यासाठी मनाई करण्यात आली आहे. या निर्णयाला एकोणसत्तर वर्षीय ज्येष्ठ कलाकार प्रमोद पांडे यांनी एड अशोक सरोगी यांच्यामार्फत याचिका करुन आव्हान दिले आहे. याचबरोबर इम्पा या निर्मात्यांचे संघटनेनेही न्यायालयात याचिका केली आहे. न्या शाहरूख काथावाला आणि न्या रियाज छागला यांच्या खंडपीठापुढे आज व्हिडीओ कॉन्फरन्सिंगद्वारे यावर सुनावणी झाली. येत्या ता. 1 ऑगस्ट नंतर संपूर्ण परिस्थितीचा फेर आढावा घेण्यात येणार आहे. त्यावेळी ज्येष्ठ कलाकारांवरील बंधनांवर फेरविचार होऊन ते शिथिल होण्याची शक्यता आहे, असे सरकारी वकील पूर्णिमा कंथारिया यांनी खंडपीठाला सांगितले.
सरकारचे निर्बंध अन्याय आणि सन्मानाने जगण्याच्या अधिकारावर घाला घालणारे आहे, त्याला कोणताही बौद्धिक अभ्यास आधार नाही, असे अमायकस क्युरी एड शरण जगतियानी यांनी सांगितले. राज्य घटनेच्या अनुच्छेद 14 आणि 21 नुसार या मनाईमुळे काम करण्याच्या मुलभूत अधिकारांवर आक्रमण होत आहे, असेही ते म्हणाले.
जर ही मनाई न मानता ज्येष्ठ कलाकार काम करायला बाहेर पडले तर त्यांच्यावर दंडात्मक कारवाई होऊ शकते का, असा प्रश्न खंडपीठाने विचारला. जर कलाकार सेटवर चित्रिकरण करायला गेले तर सरकारी नियमांचे उल्लंघन केल्यामुळे काय परिणाम होतील, असे ही न्यायालयाने विचारले. मात्र असे दंडात्मक उल्लंघन नसले तरी ज्येष्ठ नागरिकांच्या तब्येतीला धोका निर्माण होऊ शकतो. त्यामुळे सरकारने निर्बंध जारी केले आहेत, असे सरकारकडून सांगण्यात आले. याचिकेवरील सुनावणी पूर्ण झाली असून न्यायालयाने निकाल राखून ठेवला आहे. ज्येष्ठ नागरिक दुकानात बसून काम करु शकतात मग शूटिंग का नाही, असा प्रश्न न्यायालयाने यापूर्वी विचारला होता.
--------------------------------------------------
संपादन - तुषार सोनवणे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.