पाच हजाराची लाच घेणाऱ्या कृषी पर्यवेक्षकास अटक; धर्माबाद येथील घटना

नांदेड : धर्माबाद येथील एका शेतकऱ्यास ठिबक संचावर मिळणाऱ्या अनुदानाचा लाभ मिळवून देण्यासाठी पाच हजार रुपयाची लाच घेणाऱ्या धर्माबाद तालुका कृषी अधिकारी कार्यालयातील लाचखोर कृषी पर्यवेक्षक दीपक हनवते (वय ५७) याला लाचलुचपत प्रतिबंधक पथकाने मंगळवारी (ता. नऊ) फेब्रुवारीच्या रात्री आठच्या सुमारास धर्माबाद येथे रंगेहात पकडले. त्याच्याविरुद्ध धर्माबाद पोलिस ठाण्यात लाचेचा गुन्हा दाखल करण्यात आला आहे.

याबाबत अधिक माहिती अशी की, धर्माबाद येथील शेतकरी यांनी आपल्या शेतात ठिबक संच मिळावा म्हणून तालुका कृषी कार्यालयात आपला प्रस्ताव सादर केला. परंतु ठिबक संचावर मिळणाऱ्या अनुदानाचा लाभ मिळवून देण्यासाठी लाचखोर कृषी पर्यवेक्षक दीपक शंकरराव हनवते (कोळेकर) राहणार रायगडनगर, एमजीएम कॉलेजच्या बाजूस नांदेड यांनी पाच हजारांची लाच मागितली.

हेही वाचा - धर्माबादमध्ये मोबाईलद्वारे मटका घेणाऱ्यास अटक; बुकीमालक व्यंकट सुरळीकर फरार

लाच देण्याची इच्छा नसलेल्या तक्रारदाराने ता. पाच फेब्रुवारी रोजी नांदेड येथे लाचलुचपत प्रतिबंधक कार्यालयात येऊन तक्रार दिली. त्यांच्या तक्रारीच्या आधारे लाचलुचपत विभागाच्या पथकाने पडताळणी केली. पडताळणी सापळ्यातच लाचखोर कृषी पर्यवेक्षक दीपक हनवते हा पाच हजार रुपयांची लाच घेताना रंगेहात पकडल्या गेला. त्याला सरकारी पंचासमक्ष अटक केली. पोलिस निरीक्षक एस. एल. नितनवरे यांच्या फिर्यादीवरुन धर्माबाद पोलिस ठाण्यात रात्री उशिरा गुन्हा दाखल करण्यात आला.

या सापळा कारवाईत पोलिस अधीक्षक कल्पना बारावकर, अतिरिक्त पोलिस अधीक्षक अर्चना पाटील, पोलिस उपअधीक्षक विजय डोंगरे यांच्या मार्गदर्शनाखाली पोलिस निरीक्षक एस, एल, नितनवरे, पोलीस अमलदार किसन चिंचोरे, हनुमंत बोरकर, अमरजीतसिंग चौधरी आणि चालक मारुती सोनटक्के यांनी परिश्रम घेतले.