जिल्हा परिषद शाळेतील जीर्ण दस्तऐवजाला अपडेटची प्रतिक्षा

नांदेड : जिल्हा परिषद शाळेत असणारे जुने दस्तावेज जीर्ण झाले असून,  कुठे कुठे या जुन्या दस्तावेजांना वाळवी लागली आहे. दस्तऐवज आतापर्यंत अपडेट झालीच नसल्याने भवितव्याचा आधार शोधण्यासाठी मोठी कसरत करावी लागत आहे. यासाठी ही सर्व जुने दस्तावेज आधुनिक काळात अपडेट करण्याची गरज निर्माण झाली आहे.

देश स्वातंत्र्य प्राप्तीनंतर ग्रामीण भागात जिल्हा परिषदमार्फत शिक्षणाची दालने निर्माण करण्यात आली आहे. या शाळांनी अनेक विद्यार्थ्यांच्या पिढ्या अनुभवल्या आहेत. शाळा त्याच आहेत परंतु प्रारुपमध्ये बदल करण्यात आले आहेत. या शाळेत अनेक पिढ्यांचे दाखले रजिस्टरमध्ये जन्म तारखांच्या नोंदीसह कागदपत्रे उपलब्ध आहेत. गेल्या ५० वर्षापूर्वी ज्या विद्यार्थ्यांनी शिक्षण घेतले आहे, यापैकी आज घडीला बहुतांश विद्यार्थी हयात नाहीत. परंतु, त्यांच्या पाल्यांना आवश्यक दस्तऐवज तयार करताना वडीलोपार्जित नोंदी असणाऱ्या रेकॉर्डची गरज पडत असल्याने त्यांना गावातील शाळेत धाव घ्यावी लागत आहे.

परंतु शाळेत जुने रेकॉर्ड बघून थक्क झाल्यासारखे वाटत आहे. जिल्हा परिषद शाळेत असणारे जुने रेकॉर्ड जीर्ण झाले असून वारंवार रजिस्टरची उलथापालथ करण्यात येत असल्याने रेकॉर्डची अवस्था वाईट झाली आहे. महत्त्वाचे रेकॉर्ड असल्याने मुख्याध्यापक त्यांचे जतन करण्याचे प्रयत्न करतात. परंतु, त्यांच्या प्रयत्नांना बहुतांशरित्या यश येत नसल्याने कापडात गुंडाळून ठेवलेले हे रेकॉर्ड वाळवी फस्त करत असल्याचे वास्तव आहे.  

अपडेट करण्याच्या सूचनाच नाहीत
जुने रेकॉर्ड अपडेट करण्याच्या सूचना तथा आदेश जिल्हा परिषदेमार्फत देण्यात आलेले नसल्याने नाहक जनता त्रस्त होत आहे. वास्तविक ग्रामपंचायतीसह इतर विभागांतीलही जुना रेकॉर्ड अपडेट करण्यात येत आहे. परंतु, जिल्हा परिषद शाळांतील महत्त्वपूर्ण रेकॉर्डकडे कानाडोळा करत असल्याचे एका मुख्याध्यापकाने नाव प्रसिद्ध न करण्याच्या अटीवर सांगितले. 
 
शाळा संगणकीकृत, पण...
सद्यस्थितीत जवळपास सर्वच जिल्हा परिषदांच्या शाळा डिजिटल झालेल्या आहेत. या शाळेकडे संगणक आहेत.  परंतु जुना रेकॉर्ड अपडेट करण्यात आलेला नाही. यामुळे रेकॉर्ड सांभाळताना मुख्याध्यापकांची चांगलीच धांदल उडत आहे.