Nanded News : नांदेडच्या रेल्वेस्थानकाचा अमृत योजनेत समावेश ; खासदार प्रताप पाटील चिखलीकर यांची माहिती

नांदेड : अमृत योजनेतंर्गत नांदेड रेल्वे स्थानकासह जिल्ह्यातील मुदखेड, धर्माबाद, उमरी, किनवट आणि हिमायतनगर रेल्वे स्थानकाचा कायापालट होणार आहे. यासाठी आवश्यक तो निधी केंद्र सरकारने मंजूर केला आहे. त्यातून ही रेल्वेस्थानके अत्याधुनिक होतील, अशी माहिती खासदार प्रताप पाटील चिखलीकर यांनी प्रसारमाध्यमांशी बोलताना मंगळवारी (ता. सहा) दिली.

देशभरातील रेल्वे प्रवाशांना सर्वोत्तम रेल्वे सेवा देता यावी. रेल्वेचे जाळे विणले जावे या अनुषंगाने पंतप्रधान नरेंद्र मोदी यांच्या नेतृत्वाखाली केंद्रीय रेल्वेमंत्रालयातून प्रयत्न सुरू आहेत. महाराष्ट्रात एकूण ३४ प्रकल्प मंजूर करण्यात आले आहेत तसेच महाराष्ट्रातील १२६ रेल्वेस्थानके अमृत योजनेतंर्गत विकसित करण्याचा निर्णय केंद्र सरकारने घेतला होता.

यासाठीच आवश्यकता निधीही मंजूर करण्यात आला आहे. अत्याधुनिक सोयी सुविधांसह नांदेड जिल्ह्यातील रेल्वेस्थानक प्रवाशांच्या सेवेसाठी सिद्ध करण्यात येणार असल्याचे सांगून खासदार श्री. चिखलीकर यांनी रेल्वेस्थानकाचा समावेश केल्याबद्दल पंतप्रधान नरेंद्र मोदी, गृहमंत्री अमित शहा, रेल्वेमंत्री अश्विनी वैष्णव, रेल्वे राज्यमंत्री रावसाहेब दानवे पाटील, मुख्यमंत्री एकनाथ शिंदे, उपमुख्यमंत्री देवेंद्र फडणवीस व अजित पवार यांचे आभार मानले आहेत.

विविध रेल्वेस्थानकांचा होणार कायापालट

नांदेड जिल्ह्यातील नांदेडसह मुदखेड जंक्शन, धर्माबाद, उमरी, हिमायतनगर आणि किनवट या रेल्वेस्थानकाचा कायापालट होणारा असून यासाठीचा निधी प्राप्त झाला असल्याचे त्यांनी सांगितले.