सिमेंट रस्त्यांमुळे अपघाताला निमंत्रण | Sakal
sakal

बोलून बातमी शोधा

cement road

सिमेंट रस्त्यांमुळे अपघाताला निमंत्रण

नांदेड - लाखो रुपये खर्च करून शहरांसह गावागावांमध्ये सिमेंट रस्ते तयार करण्यात आले. परंतु, रस्ते दिसण्यास जरी सुंदर असले तरी ते योग्य नियोजनाअभावी धोकादायक ठरत आहे. त्यामुळे हे रस्ते लोकांच्या सोयीसाठी की गैरसोयीसाठी? असा प्रश्न नागरिकांच्या मनात निर्माण झाला आहे.

आपले गाव, शहर सुंदर दिसण्यात रस्ते व नाल्याचे बांधकाम यांचे अनन्यसाधारण महत्त्व आहे. आपल्या गावातील रस्ते पक्के असावे असे प्रत्येक नागरिकांची अपेक्षा असणे साहजिकच आहे. नागरिकांच्या या अपेक्षेला मूर्तरूप देण्यासाठी खेडोपाडी, गावागावात विविध प्रकारच्या निधीतून सिमेंट रस्ते बांधण्याचा सपाटा सुरु आहे. संबंधित विभागाच्या अभियंत्यांनी तयार केलेल्या अंदाजपत्रकानुसार कंत्राटदार या रस्त्याचे बांधकाम करू लागले. त्यामुळे अंदाजपत्रकातील लांबी, रुंदी आणि उंची नुसार रस्ते तयार झाले.

परंतु प्रत्यक्षात अस्तित्वात असलेल्या रस्त्याची रुंदी मात्र कुणीच लक्षात घेताना दिसत नाही. त्यामुळे मध्यभागी सिमेंट रस्ता आणि दोन्ही बाजूला ९० अंशांच्या कोनामध्ये असलेले सुमारे अर्धा फूट खोल खड्डे अशीच काहीसे चित्र बहुतेक गाव खेड्यामध्ये दिसून येत आहे. त्यामुळे दुचाकी किंवा चारचाकी वाहने रस्त्याच्या कडेला गेले की अपघात होण्याची शक्यता वाढली आहे. याचबरोबर पायदळ चालताना अनावधानाने बालक, वृद्ध एवढेच नव्हे तर तरुणांना देखील या रस्त्याने आपला हिसका दाखवला आहे.

दुरुस्ती व व्यवस्थापन खर्च मुळातच कमी लागत असल्यामुळे सिमेंट रस्त्यांना प्रशासकीय यंत्रणा व स्थानिक स्वराज्य संस्थांनी अधिक प्राधान्य दिलेले दिसून येत आहे. सिमेंट रस्ता उंच झाल्यामुळे त्याच्या दोन्ही बाजूला तयार करण्यात आलेल्या खड्ड्यांमध्ये मुरुम भरण्याचे सौजन्य मात्र कोणी दाखवत नाही किंवा संपूर्ण रस्त्यांचे सिमेंटीकरण करीत नाही. ते वापरणाऱ्यांच्या गैरसोयीचे ठरू नयेत, अशी अपेक्षा नागरिक करत आहेत.

रस्त्याची अवस्था बिकटच

सिमेंट रस्त्यांमुळे ग्रामीण भागात देखील उष्णतेत वाढ झाली आहे. जमिनीत पाणी मुरत नसल्यामुळे भूगर्भातील पाण्याची पातळी खालावत आहे. रस्ते व्यवस्थित बांधले नसल्यामुळे पावसाळ्यात त्याची घसरण होण्याची भीती निर्माण झाली आहे. प्रशासकीय यंत्रणेच्या दुर्लक्षितपणामुळे अनेक ठिकाणी कामे निकृष्ट झाल्याचे नागरिक सांगतात. एकूणच सिमेंट रस्त्याची अवस्था विविध ठिकाणी बिकटच असल्याचे वास्तव बघायला मिळत आहे.

Web Title: Invitation To Accidents Due To Cement Roads

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top