Video : नगीनाघाटसह गुरुद्वारा परिसर सील

नांदेड : सचखंड गुरुद्वारा लंगर साहेब परिसरातील २० कर्मचरी कोरोना बाधीत झाल्याचा अहवाल शनिवारी (ता.दोन) आल्यानंतर, जिल्हा व महापालिका प्रशासन खडबडून जागे झाले. त्यांनी सकाळी नगीनाघाट गुरुद्वारा परिसर पूर्णपणे सील करून निर्जंतुकीकरणाची फवारणी केली.  

नगिनाघाट गुरुद्वारा परिसर हा नांदेड वाघाळा महापालिकेच्या हद्दीत येतो. या परिसरामध्ये शनिवारी २० कोरोनाबाधित रुग्ण आढळून आले. त्यामुळे नगिनाघाट गुरुद्वारा परिसर, गुरुद्वारा लंगरसाहेब परिसर, गुरुद्वारा सचखंड गेट क्रमांक एक ते देना बॅंक, तसेच गेट क्रमांक दोन ते सहा परिसर, चिखलवाडी, कनकय्या कंपाउंड, बडपूरा, शहीदपुरा, रामकृष्ण टॉकीज परिसर या क्षेत्रामध्ये कोरोना रोगाचा संसर्ग होऊ नये म्हणून हा परिसर ‘कंटेनमेंट झोन’ म्हणून शनिवारी जाहीर करण्यात आला आहे. या परिसरातील प्रत्येक नागरिकांच्या हालचालीवर जिल्हा, पोलिस प्रशासन लक्ष ठेवून आहे.

हेही वाचा - Nanded Breaking : गुरुद्वारा लंगर साहिब परिसरातील २० कर्मचारी पॉझिटिव्ह, रुग्णांची संख्या २६

उल्लंघन करणाऱ्यांवर दंडात्मक कारवाई
जिल्हाधिकारी डॉ. विपीन यांच्या निर्देशानुसार सर्व आवश्‍यक त्या सेवा या भागामध्ये पूर्णतः बंद करण्यात आलेल्या आहेत. या सेवा महापालिकातर्फे घरपोच देण्यात येतील. त्यासाठी नियंत्रण अधिकारी अधिकारी प्र.कार्यकारी अभियंता सुनील देशमुख यांची नियुक्तीही तत्काळ करण्यात आली आहे. तसेच सहाय्यक अधिकारी म्हणून प्रकाश गच्चे व त्यांचे अधिनस्त कार्यालय अधिक्षक, सुपरवायधर आणि वसुली लिपीकांची नियुक्ती करण्यात आली. या आदेशाचे उल्लंघन करणाऱ्यांवर दंडात्मक कारवाई करण्यात येणार असल्याचे महापालिका आयुक्त डॉ. सुनिल लहाने यांनी आदेशात म्हटले आहे.  

नोडल अधिकाऱ्यांशी साधावा संपर्क
गुरुद्वारा लंगर साहेब परिसरातील २० कर्मचारी शनिवारी कोरोनाबाधित झाल्याने गुरुद्वारा परिसर पूर्णतः सील करण्यात आला आहे. दरम्यान गुरुद्वारा परिसरातील नागरिकांनी अत्यावश्‍यक सेवेसाठी डॉ. मोहम्मद बदीयोद्दीन (९८२३०१२४५६), डॉ. बळीराम भुरके (९८८११२०८७३), सुनिल देशमुख (९०११०००९६०) आणि प्रकाश गच्चे (८८८८८०१९६०) यांच्याशी संपर्क साधण्याचे आवाहन आयुक्त डॉ. सुनिल लहाने यांनी केले आहे. 

येथे क्लिक कराच - Video : बेभान ! नांदेडकर कधी येणार भानावर ?  

११ अहवालांची प्रतिक्षा
नांदेडमध्ये अडकलेले सर्व यात्रेकरू पंजाबकडे रवाना झाल्यानंतर म्हणजे ३० एप्रिल ते एक मे २०२० या कालावधीत गुरुद्वारा लंगर साहिब परिसरातील ९७ व्यक्तिंचे स्वॅब घेण्यात आले होते. त्याचा अहवाल शनिवारी (ता.दोन) प्राप्त झाला असून त्यात गुरुद्वारा लंगर साहेब येथील २० कर्मचारी हे कोरोना विषाणूमुळे बाधित झाले. त्यांच्या संपर्कातील २५ व्यक्तिंचे अहवाल हे निगेटिव्ह तसेच ११ स्वॅब हे अनिर्णित आहेत. त्यामुळे आता उर्वरीत अहवालांची प्रतिक्षा आहे.