नांदेड : बालकांना समाजाने योग्य वळण लावावे : विद्या आळणे

नांदेड : लहान बालकांना योग्यवेळी योग्य तो मार्ग दाखवला तर ते निश्चीतच ते चांगल्या मार्गावर चालतात. यासाठी समाजाच्या प्रत्येक घटकांनी बालकांच्या मनावर चांगले प्रतिबिंब उमटतील याची काळजी घेत त्यांना चांगले वळण द्यावे असे आवाहन जिल्हा बाल संरक्षण अधिकारी विद्या आळणे यांनी केले. त्या हजुर साहिब रेल्वेस्थानक येथे आयोजीत एका कार्यक्रमात बोलत होत्या.

जिल्हा महिला व बालविकास विभाग अंतर्गत जिल्हा संरक्षण कक्षाच्या वतीने नांदेडच्या हजूर साहिब रेल्वे स्थानकावर बालकांचे हक्क सुरक्षीतता सप्ताह व आंतरराष्ट्रीय दत्तक महिन्याचा पार्श्वभूमीवर नुकतीच कार्यशाळा घेण्यात आली. या कार्यशाळेत बाल न्याय मुलांची काळजी व संरक्षण अधिनियम व दत्तक विधान प्रक्रिया तसेच बालकांचे हक्क व अधिकार याबाबत मार्गदर्शन करण्यात आले.

हेही वाचा - अल्प कापूस उत्पादन अन् बाजारपेठेत मिळेना भाव

बालकांचे हक्क व सुरक्षिततेच्या दृष्टीने करावयाच्या उपाययोजना बालकांसाठी महत्त्वपूर्ण यंत्रणा याबाबत कार्यशाळेत जिल्हा बाल संरक्षण अधिकारी विद्या आळणे यांनी सविस्तर माहिती दिली. तसेच बालकांना योग्य वेळी योग्य असे वळण दिले तर ते नक्कीच येणाऱ्या काळात ते चांगली पीढी म्हणून समाजाचे नेतृत्व करु शकतात. त्यासाठी समाजाच्या प्रत्येक घटकांनी पुढाकार घ्यावा असे आवाहन त्यांनी केले. 

जिल्ह्यात बालकल्याण समिती 24 तास कार्यरत असल्याचे समितीच्या सदस्या अॅड. सावित्री जोशी यांनी सांगितले. तसेच बाल न्याय मंडळाचे सदस्य डॉ. हरदिपसिंग यांनी कोरोनाच्या काळात विधिसंघर्षग्रस्त बालकांचे प्रमाण वाढल्याची माहिती दिली. या बालकांचे पुनर्वसन करण्यासाठी सर्व यंत्रणांचे सहकार्य आवश्यक असल्याचे ते म्हणाले.

येथे क्लिक करा - नांदेड जिल्ह्यातील जिल्हा परिषद शाळांतील अंधार संपणार

रेल्वे सुरक्षा बलाचे सहाय्यक पोलिस निरीक्षक सोपान बाईक यांनी बालकांच्या हक्कासाठी सहकार्य करण्याचे आश्वासन दिले. सदर कार्यशाळेला डॉ. पी.डी. जोशी पाटोदेकर, रवी कापुरे, ज्योती सावळे, श्री तिवारी यांच्यासह रेल्वे सुरक्षा बलाचे कर्मचारी, जिल्हा बाल संरक्षण कक्षाचे कर्मचारी, शिशुगृह अधीक्षक, स्वयंसेवी संस्थांचे प्रतिनिधी, सफाई कामगार व चाईल्डलाईनचे कर्मचारी उपस्थित होते.