Nanded : विद्यापीठात एफटीआयआय चे अभ्यासक्रम

नांदेड : स्वामी रामानंद तीर्थ मराठवाडा विद्यापीठात भारतीय चित्रपट आणि दूरचित्रवाणी संस्थेच्या (एफटीआयआय- पुणे) सहयोगाने अभ्यासक्रम सुरू करण्यात येणार असल्याची घोषणा सोमवारी (ता.तीन) कुलगुरू डॉ. उद्धव भोसले यांनी केली. संस्था व विद्यापीठ यांच्यात सोमवारी ज्ञानाच्या देवाणघेवाणीसंदर्भात सामंजस्य करार झाला.

या वेळी स्वातंत्र्याच्या अमृत महोत्सवानिमित्त अनुसूचित जमातीच्या विद्यार्थ्यांसाठी मोफत चित्रपट लघुअभ्यासक्रमाची सुरवात करण्यात आली. ‘एफटीआयआय’चे संचालक संदीप शहारे, विद्यापीठाचे प्र-कुलगुरू डॉ. जोगेंद्रसिंह बिसेन, कोर्स डायरेक्टर पंकज‌ सक्सेना, डॉ. सर्जेराव शिंदे, डॉ. एल. एम. वाघमारे, डॉ. राजाराम माने, परीक्षा व मूल्यमापन मंडळाचे संचालक डॉ. दिगंबर नेटके, डॉ. पृथ्वीराज तौर, डॉ. अनुराधा पत्की आदी उपस्थित होते.

‘एफटीआयआय’सोबतच्या करारामुळे अध्ययन व संशोधनासंदर्भात विद्यार्थ्यांना नव्या संधी उपलब्ध होतील असा आशावाद कुलगुरूंनी व्यक्त केला. विद्यापीठाच्या प्रयत्नांचे शहारे यांनी स्वागत केले. स्वातंत्र्याच्या अमृत महोत्सवानिमित्त अनुसूचित जमातीच्या विद्यार्थ्यांसाठी मोफत लघु अभ्यासक्रम आयोजित करणारे विद्यापीठ हे राज्यातील पहिले आहे, असेही ते म्हणाले. बीबीसी वर्ल्डवाईड या वाहिनीचे माजी प्रोग्रॅमिंग हेड पंकज सक्सेना यांनी चित्रपटाचे मानवी जीवनाशी असणारे घनिष्ठ नाते यावर भाष्य केले. डॉ. पृथ्वीराज तौर यांनी प्रास्ताविक केले.

चार अभ्यासक्रमांचे आयोजन

अनुसूचित जमातीसाठी असणाऱ्या अभ्यासक्रमांची संदीप शहारे यांच्या हस्ते सुरवात झाली. चित्रपट आस्वाद, स्मार्टफोन चित्रपट निर्मिती, चित्रपट अभिनय आणि पटकथालेखन असे चार अभ्यासक्रम पुढील महिनाभर नियोजित आहेत. त्यात सहभागी होण्यासाठी डॉ. अनुराधा पत्की आणि डॉ. राहुल गायकवाड यांच्याशी संपर्क साधण्याचे आवाहन डॉ. तौर यांनी केले.