नांदेड : ग्रामपंचायतीच्या प्रारूप मतदार याद्यांनी केली पती- पत्नीची ताटातूट, मतदार याद्यावर आक्षेपांचा पाऊस

अर्धापूर (जिल्हा नांदेड) : तालुक्यातील 44 ग्रामपंचायतीच्या निवडणुकीच्या पहिल्या टाप्याची प्रक्रिया सुरू असून निवडणूक विभागाने प्रकाशित केलेल्या प्रारूप मतदार यादीत खूप मोठा घोळ दिसून आल्याने स्थानिक लोकप्रतिनिधी चक्रावून गेले आहेत. या प्रारूप मतदार यादीत पतीचे नाव एका वार्डात मतदान तर पत्नीचे नाव दुस-या वार्डात टाकून ताटातूट केली आहे. या मतदार याद्यांवर आक्षेपांचा पाऊस पडला  असून तालुक्यातील विविध गावातून सुमारे 140 अक्षेप दाखल झाले आहेत.यात सर्वाधिक लोणी खुर्द मधून सुमारे 59 आक्षेप दाखल झाले आहेत. तहसील कार्यालयात दाखल झालेल्या सर्व आक्षेपांची तपासणी करण्यात येत असून अंतिम यादी सोमवारी (ता 14) रोजी प्रकाशित करण्यात येणार आहे.

तालुक्यातील 46 ग्रामपंचायतीच्या सरपंचपदांचे आरक्षण घोषित झाल्यावर ग्रामीण भागातील थंडीच्या दिवसात राजकीय वातावरण तापत आहे. प्रत्यक्ष निवडणुकीचा कार्यक्रम घोषित झाला नसला तरी स्थानिक पातळीवरील लोकप्रतिनिधीचे गट सक्रिय झाले असून मोर्चे बांधणी सुरु झाली आहे.

हेही वाचा - नांदेड : अर्धापुरात पुर्णा प्रकल्पाच्या अधिकाऱ्यांचा हलगर्जीपणाचा फटका, एकहजार हेक्टरच्यावर शेतीला पाणी नाही -

कोणत्याही निवडणुकीत मतदार यादीचे अनन्यसाधारण महत्व आहे.ग्रामपंचायतीच्या निवडणुकीत उपयोगात येणा-या प्रारूप मतदार याद्या निवडणूक विभागाने प्रकाशित केल्या आहेत. या मतदार यादीत घोळ झाल्याने स्थानिक उत्सुक उमेदवारांनी लेखी आक्षेप घेतले आहेत. या मतदार याद्यात पती - पत्नीची ताटातूट झाली आहे. एका वॉर्डत पतीचे नाव तर दुस-या वार्डात पत्नीचे मतदार यादीत नाव समाविष्ट करण्यात आले आहे. तसेच एकाच कुटूंबातील सदस्यांचे नांव देखील वेगवेगळ्या वार्डत सामाविष्ट झाले आहे.

या मतदार याद्या पाहिल्यावर स्थानिक नेत्यांना व कुटूंब प्रमुखांना धक्काच बसला आहे. या चुकीच्या मतदार याद्यांवर आक्षेपांचा पाऊस पडला आहे. गावनिहाय आक्षेपांची संख्या पुढील प्रमाणे आहेत. पाटणूर एक, पार्डी तीन, चाभरा 14, चोरंभा एक, खैरगाव बुद्रुक एक, लोणी खुर्द 59, लहान एक, लोणी बुद्रूक तीन, येळेगाव तीन, पिंपळगाव एक, शैलगाव बुद्रुक 26, बारसगाव दोन, शाहपूर दोन, खैरगांव दोन, देळूब खुर्द चार, धामदरी, पाच, मालेगाव दोन, बामणी दोन, मेंढला बुद्रूक एक आसे आक्षेप दाखल झाले आहेत.

तहसील कार्यालयात दाखल झालेल्या आक्षेपांची मंडळ अधिका-यांमार्फत तपासणी करण्यात येत आहे. तपासणी झाल्यावर अंतिम यादी निवडणूक आयोगाच्या आदेशानुसार प्रकाशित करण्यात येणार आहे अशी माहिती निवडणूक विभागाने दिली आहे.

संपादन - प्रल्हाद कांबळे