नांदेड : प्रेम प्रकरणातून तरुणीचा खून

नांदेड : प्रेम प्रकरणातून तरुणीचा निर्घृण खून केल्याची घटना रविवारी (ता.२४) सकाळी शहरातील शारदानगर भागात घडली. पळून जाणाऱ्या संशयितास पोलिसांनी पाठलाग करून पकडले.

शारदानगरातील अॅड. हरदळकर यांच्या इमारतीत संजयसिंग गौर भाड्यान राहतात. आज सकाळी ते नेहमीप्रमाणे आपल्या खासगी नोकरीनिमित्त घराबाहेर पडले. पत्नी कामानिमित्त बाहेर गेली होती. त्यांची मुलगी वैष्णवी संजयसिंग गौर (वय २०) ही घरी एकटीच होती. ही संधी साधून सुरेश देविदास थेंडगे (वय २४, रा. पांगरी, ता. नांदेड) हा तिच्या घरी गेला. यावरून दोघांत वाद झाला. थेंडगेने धारधार हत्याराने वैष्णवीच्या गळ्यावर सपासप वार केले.

त्यात तिचा जागीच मृत्यू झाला. परिसरातील नागरिकांनी माहिती देताच विमानतळ पोलिस ठाण्याचे निरीक्षक अनिरुद्ध काकडे यांनी सहकाऱ्यांसह घटनास्थळी धाव घेतली. पळून जात असलेल्या थेंडगेला पोलिसांनी पाठलाग करून पकडले.

प्रेम प्रकरणातून ही घटना घडली असावी, असा संशय पोलिसांनी व्यक्त केला. संजयसिंह गौर यांनी दिलेल्या फिर्यादीवरून विमानतळ पोलिस ठाण्यात खुनाचा गुन्हा दाखल झाला. थेंडगेला अटक केली असून सोमवारी (ता.२५) न्यायालयात हजर केले जाणार आहे. इमारतीवरून फेकून जीवे मारण्याचा प्रयत्न