नांदेड : माॅन्सूनपूर्व पावसाचा केळीला फटका

नांदेड : जिल्ह्यात बुधवारी झालेल्या मान्सूनपूर्व वादळी पावसामुळे अर्धापूर तालुक्यातील बामणी शिवारात केळीच्या बागा आडव्या पडल्या आहेत. गुरुवारीही पावसाने हजेरी लावली. हा पाऊस भोकर मंडळात ३१ मिलीमीटर झाल्याने शेतात पाणी साचले होते.

अर्धापूर तालुक्यातील बामणी शिवारात बुधवारी रात्री काही भागात वादळी वाऱ्यांसह पावसाचा फटका शेतीला बसला. कमी-अधिक प्रमाणात वादळी वाऱ्यांसह अवकाळी पावसामुळे शेतकऱ्याच्या अडचणी वाढल्या आहेत. तालुक्यातील बामणी शिवारात संतोष बडायल्या, अशोक देलमडे यांच्यासह अनेक शेतकऱ्यांच्या केळी बागाला फटका बसला. काही ठिकाणी केळीची झाडे उन्मळून पडली आहेत.

पंधरा दिवसावर काढणीस आलेल्या केळीची झाडे पडल्याने परिसरातील शेतकऱ्यांचे नुकसान झाले आहे. जिल्ह्यात गुरुवारी सायंकाळी पूर्वमोसमी पावसाने हजेरी लावली. हा पाऊस भोकर मंडळात ३१ मिलीमीटर झाला. या पावसामुळे शिवारात पाण्याचे तळे तयार झाले होते. जिल्ह्यात इतर काही ठिकाणी हलक्या पावसाच्या सरी कोसळल्या. या पावसामुळे शेतकरी पेरणीपूर्व कामांना गती देत आहेत.