नांदेड : शिवाजीनगर औद्योगिक वसाहतीतील रस्ते चकाकणार 

नांदेड : महाविकास आघाडीच्या वर्षपूर्तीनिमित्त नांदेड शहरातील विविध प्रकल्प मार्गी लागणार असून पालकमंत्री अशोकराव चव्हाण यांच्या ड्रीम प्रॉजेक्टमध्ये समाविष्ट असलेल्या शिवाजीनगर येथील कै.रामगोपाल गुप्ता औद्योगिक वसाहतीतील रस्ते व कॅनॉल रस्ता चकाकणार आहे. या संदर्भात शासनाने तत्वतः मान्यता दिली असून लवकरच या कामास सुरुवात होणार असल्याचे श्री. चव्हाण यांनी एका प्रसिद्धीपत्रकाद्वारे कळविले आहे. 

नांदेड शहरातील मध्यभागी असलेल्या शिवाजीनगर येथील कै. रामगोपाल गुप्ता औद्योगिक वसाहतीतील अंतर्गत रस्त्यांची अवस्था अत्यंत दयनीय झाली आहे. मागील भाजप सरकारच्या काळात या रस्त्यांच्या दुरुस्तीकडे मुद्दामहून दुर्लक्ष करण्यात आले होते. परंतु राज्यामध्ये महाविकास आघाडीचे सरकार आल्यानंतर पालकमंत्री अशोकराव चव्हाण यांनी या कामांमध्ये पुढाकार घेतला. १२ मार्च २०२० रोजी उद्योगमंत्री सुभाष देसाई व पालकमंत्री अशोकराव चव्हाण यांच्या प्रमुख उपस्थितीमध्ये विधान भवनात एक बैठक झाली. 

हेही वाचा - मेडीकल कॉलेजसाठी आता ताकदीनिशी संघर्ष, परभणीकर संघर्ष समितीच्या पहिल्याच बैठकीत निर्णय

या बैठकीस माजी पालकमंत्री डी.पी.सावंत व आमदार अमर राजूरकर यांची उपस्थिती होती. या बैठकीमध्ये औद्योगिक वसाहतीतील अंतर्गत रस्ते व नाल्या बांधकामासाठी २४.५५ कोटीचा प्रारुप आराखड्यावर चर्चा झाली. त्यातील २५ टक्के हिस्सा हा महापालिकेने उचलण्यास सहमती दर्शविली. त्यामुळे या कामांना शासनाने तत्वतः मान्यता दिली आहे. आता या कामाचा प्रस्ताव एम.आय.डी.सी.च्या कार्यकारी मंडळापुढे असून लवकरच या कामांना प्रशासकीय मान्यता मिळणार असल्याचे श्री. चव्हाण यांनी प्रसिद्धीपत्रकात म्हटलेले आहे 

हे देखील वाचाच - नांदेड जिल्ह्यातील जिल्हा परिषद शाळांतील अंधार संपणार

कॅनॉल रस्ताही चकाकणार 
डीआरएम ऑफीसपासून निळा रोडपर्यंत कॅनॉल रस्ता तयार झाला. परंतु निळा जंक्शन ते मरळक फाट्यापर्यंतचा नादुरूस्त कॅनॉल तसाच आहे. या बंद असलेल्या कॅनॉलमध्ये पाणी साचल्यामुळे दुर्गंधी पसरून लोकांच्या आरोग्यास धोका निर्माण झाला आहे. या पार्श्वभूमीवर मरळक फाटा ते डीआरएम ऑफीस हा पाच किलोमिटरचा संपूर्ण कॅनॉल रस्ता सिमेंट काँक्रीटमध्ये बनविण्याचा प्रस्ताव सार्वजनिक बांधकाम विभागाकडून तयार करण्यात आला आहे. 
- आमदार डी. पी. सावंत, माजी पालकमंत्री